Samarqandda qimorxona fosh etildi

Samarqand shahrida joylashgan choyxonada tashkil etilgan qimorxona fosh etilgan. Bu haqda viloyat IIB axborot xizmati xabar bermoqda.

Ma'lum qilinishicha, 2021 yil 5 dekabr kuni DXX Samarqand viloyati boshqarmasi hamda Samarqand shahar IIO FMB xodimlari hamkorligida tezkor tadbir o‘tkazilgan.

Tadbir davomida Samarqand shahar Humo mahallasida joylashgan choyxonada 17 nafar fuqaro qimor o‘ynayotgani aniqlangan.

Dastlabki surishtiruvda aniqlanishicha, qimor o‘yinlari Humo mahallasida yashovchi 1958 yilda tug‘ilgan X.O. tomonidan tashkil qilib kelingan.

Voqea joyini ko‘zdan kechirish davomida o‘yinchilar tomonidan qimor uchun tikilgan jami 718 ming so‘m pullar, 100 dona karta kolodalari borligi aniqlangan.

Qayd etilishicha, hozirda holat yuzasidan tergovga qadar tekshiruv ishlari olib borilmoqda.