Bishkekda Rossiya elchixonasi yaqinida mitinglar o‘tkazish taqiqlandi

Bishkekning Pervomayskiy rayon sudi Qirg‘iziston poytaxtida, jumladan, Rossiya elchixonasi yaqinida miting va aksiyalar o‘tkazishni taqiqladi. Bu haqda sud vakiliga tayanib "Interfaks" xabar berdi.

"Pervomayskiy rayon sudi qaroriga ko‘ra, 10 martdan 11 aprelga qadar miting va aksiyalar o‘tkazish taqiqlandi", - deb ma’lum qildi sud vakili.

Uning so‘zlariga ko‘ra, Pervomayskiy rayoni ichki ishlar boshqarmasi sudga har qanday aksiyalarni cheklash to‘g‘risidagi so‘rov bilan murojaat qilgan.

Sud vakilining aytishicha, cheklov kiritilishiga Rossiyaning Bishkekdagi elchixonasi yaqinida fuqarolar va nohukumat tashkilotlar tomonidan turli ko‘rinishdagi mitinglar tashkil etib kelingani sabab bo‘lgan.