Farg‘ona viloyatida harakatdagi Orlando yonib ketdi

Farg‘ona viloyati Yozyovon tumanida harakatlanib ketayotgan Orlando avtomobilida sodir bo‘lgan yong‘in o‘chirildi, deb xabar bermoqda viloyat FVB matbuot xizmati.

Ma’lum qilinishicha, 12 iyun kuni soat 09:56 da tumanning «Yangibo‘ston» MFY hududida harakatlanib ketayotgan, 2014 yilda ishlab chiqarilgan Orlando rusumli avtomobilning texnik nosozligi oqibatida yong‘in kelib chiqqan.

O‘t o‘chiruvchilar yong‘in joyiga soat 10:14 da yetib borishgan, yong‘in soat 10:15 da o‘rab olinib, 10:19 da o‘chirilgan. Taxmin qilinishicha, hodisaga elektr simlari qisqa tutashuvi sabab bo‘lgan.

Hodisa oqibatida hech kim jabrlanmagan.

Bundan avvalroq Toshkent viloyati Bo‘stonliq tumanida Captiva yonib ketgani xabar qilingandi.