200 ming so‘mlik pul muomalaga chiqarildi

Bugun, 15 iyul O‘zbekistonda 200 ming so‘mlik banknota muomalaga chiqarildi.

Yangi banknot ham Buyuk ipak yo‘li tematikasida. Uning dizayni Farg‘ona vodiysining qadimiy tarixiga bag‘ishlangan.

Markaziy bankning Kun.uz'ga ma’lum qilishicha, 200 ming so‘mlik banknotlarni chiqarishdan maqsad – naqd pulda to‘lovlarni amalga oshirishda aholiga qulaylik yaratishdir.

“Jahon tajribasida soha mutaxassislarining tavsiyalariga ko‘ra, eng katta nominaldagi banknotlarning jami muomaladagi naqd pullardagi salmog‘i 50 foizga yaqinlashganda kattaroq nominaldagi banknotni muomalaga chiqarish choralarini ko‘rish lozim.

Tahlil natijalariga ko‘ra, 2022 yil 1 iyul holatiga 100 000 so‘mlik banknotlarning jami muomaladagi naqd pullardagi salmog‘i yil boshidagi 34,8 foizdan 43,4 foizga ko‘tarilganini ko‘rsatdi.

Iqtisodiyot kengayishi ortidan naqd pul aylanmasi, muomaladagi naqd pullar hajmining oshgani va o‘sish dinamikasining davom etayotgani 200 000 so‘mlik banknotni muomalaga chiqarish jarayonini tezlashtirish zaruriyatini yuzaga keltirdi”, – deyiladi Markaziy bank izohida.

O‘zbekistonda barcha qog‘oz pul belgilari Buyuk ipak yo‘li mavzusidagi yangi banknotlarga almashtirilmoqda. Bu tematikadan tashqarida qolayotgan yagona kupyura – ming so‘mlik esa tanga shakliga o‘tkaziladi. Ming so‘mlik tanga dizayni hozircha e’lon qilinmadi, dizaynni Senat kengashi ma’qullagan.

Madina Ochilova,
Abdusalim Abduvohidov,
Kun.uz