Parkent tumani prokurori Sharifjon Akbarov ishdan olindi

14 iyul kuni Parkent tumani prokurori Sharifjon Akbarov ishdan olingan. Kun.uz manbasining xabar berishicha, prokurorning ishdan olinishiga aynan uning tashabbusi bilan Parkent tumani hokimining o‘rinbosarlaridan biri jinoyat ishi doirasida ehtiyot chorasi sifatida qamoqqa olingani sabab bo‘lgan.

Manbaga ko‘ra, ko‘p o‘tmay hokim o‘rinbosari ozodlikka chiqarilgan, qamoqqa olish to‘g‘risida iltimosnomani kiritishda qonunbuzilishiga yo‘l qo‘ygani uchun prokuror Sharifjon Akbarov esa lavozimidan ozod etilgan.

Kun.uz bilan gaplashgan Parkent tumani hokimligi mas’ul xodimi hokim o‘rinbosari qamoqqa olinmaganini bildirdi. Tuman prokurorining ishdan olinganidan esa bexabarligini aytdi.

Toshkent viloyat prokuraturasi axborot xizmati xodimi esa tuman prokurori Sharifjon Akbarovning ishdan olinganini inkor etmadi. Shuningdek, buning sabablarini ochiqlamadi.

Sharifjon Akbarov – 2022 yil fevral oyida Parkent tumani prokurori lavozimiga tayinlangan. Unga qadar Bosh prokuraturada boshqarma boshlig‘i o‘rinbosari lavozimida ishlab kelgan.