Ozarboyjon Tog‘li Qorabog‘dagi armanlarni reintegratsiya qilish rejasini ma’lum qildi

Boku Tog‘li Qorabog‘ va uning arman aholisini «reintegratsiya» rejasini taqdim etdi, deb xabar berdi Ozarboyjon prezidenti ma’muriyatiga tayanib Trend. 

«Etnik, diniy yoki tilga mansubligidan qat’i nazar, hammaning teng huquq va erkinliklari, shu jumladan, barchaning xavfsizligi kafolatlanadi», dedi Tog‘li Qorabog‘dagi armanistonliklar bilan aloqalar uchun mas’ul etib tayinlangan Ramin Mamedov. 

Armaniston fuqarolari yashaydigan hududni boshqarish Ozarboyjon Prezidentining maxsus vakolatxonalari orqali amalga oshirilishi rejalashtirilgan. Saylovlar davomida munitsipalitetlar tuziladi. Fuqarolik va mulk masalalari Ozarboyjon qonunchiligi va Konstitutsiyasiga muvofiq tartibga solinadi. 

Xavfsizlik sohasida aholidan barcha qurollar musodara qilinib, qurolsizlantirish va demobilizatsiya jarayonini yakunlash kutilmoqda. Hududda jamoat tartibini saqlash va aholi xavfsizligini Ozarboyjon ichki ishlar organlari ta’minlaydi, mahalliy aholi esa ular tomonidan ishga jalb qilinishi mumkin. 

Iqtisodiy sohada viloyat aholisiga soliq va bojxona imtiyozlari taqdim etiladi. Tadbirkorlarni qo‘llab-quvvatlash, jumladan, «imtiyozli kreditlar, foizli subsidiyalar, kredit kafolatlari» va boshqa moliyaviy vositalar va’da qilingan. Fermerlar yer solig‘idan tashqari barcha soliqlardan ozod qilinadi. Hududda Ozarboyjon milliy valutasi «manat» muomalaga kiritiladi. 

Tog‘li Qorabog‘ aholisi Ozarboyjon bo‘ylab qo‘llaniladigan ish haqi, ijtimoiy nafaqalar va imtiyozlar tizimiga bo‘ysunadi. Boku ularga o‘z madaniyatini saqlash va rivojlantirish, diniy e’tiqod erkinligi, madaniy va diniy yodgorliklarni saqlash, arman tilidan foydalanish kafolatlarini va’da qiladi. 

Tan olinmagan Tog‘li Qorabog‘ Respublikasi 1991 yil sentabr oyidan beri mavjud. 19 sentabr kuni Ozarboyjon mintaqada «aksilterror» deb atagan harbiy operatsiyani boshladi. 28 sentabr kuni Tog‘li Qorabog‘ Respublikasi prezidenti Samvel Shaxramanyan 2024 yil 1 yanvardan uning faoliyatini tugatish va barcha davlat organlarini tarqatib yuborish to‘g‘risidagi farmonni imzoladi. Armaniston rasmiylariga ko‘ra, Tog‘li Qorabog‘dan mamlakatga 100 mingdan ortiq qochqinlar kelgan.