Shols va Sunak Ukrainani qo‘llab-quvvatlash masalasini muhokama qildi

Germaniya kansleri Olaf Shols va Britaniya bosh vaziri Rishi Sunak Ukrainadagi vaziyat haqida telefon orqali muloqot qildi – bu haqda Shols 19 yanvar, juma kuni X ijtimoiy tarmog‘idagi sahifasida xabar berdi. London va Berlin Rossiya Federatsiyasi tomonidan boshlangan urushda «Ukrainaga jiddiy va barqaror yordam berishda davom etishi kerak», deb ta’kidladi kansler postda. 

Suhbat faktini Britaniya bosh vazirining idorasi tasdiqladi. Unga ko‘ra, Sunak Shols bilan yaqinda Kiyevga amalga oshirgan tashrifini muhokama qilgan, u va Ukraina prezidenti Volodimir Zelenskiy ikki davlat uchun xavfsizlik kafolatlari to‘g‘risidagi bitimni imzolagan. Bundan tashqari, London Berlinga 2024 yilda Kiyevga harbiy yordam uchun kamida 2,5 milliard funt sterling (taxminan 2,9 milliard yevro) ajratishi haqida ma’lum qildi. 

Shols va Sunak, shuningdek, Germaniya va Britaniya o‘rtasida mudofaa va havo mudofaasi, Yaqin Sharqda mintaqaviy barqarorlikni qo‘llab-quvvatlash, Yevropada migratsiya inqirozi sohasidagi «kengroq hamkorlik» masalasini ko‘rib chiqdi, deb yozadi Dauning-stritdagi ofis. Mamlakat rahbarlari «odam kontrabandasi bilan shug‘ullanuvchi jinoyatchilar to‘dalariga qarshi kurashish uchun butun qit’ada qat’iy, birgalikda harakat qilish muhimligini» qayd etdi. 

Germaniya 2024 yilda Kiyevga harbiy yordam uchun 7 mlrd yevro ajratadi

Avvalroq Germaniya hukumati matbuot xizmati Berlin 2024 yilda Ukrainaga harbiy yordam uchun ajratmoqchi bo‘lgan mablag‘ni deyarli ikki baravar oshirishini ma’lum qilgandi. 2023 yil oxirida Germaniya budjetini ishlab chiqishda ushbu maqsadlar uchun 4 milliard yevro ajratilgan, ammo hukumat keyinchalik rejalarni o‘zgartirdi.

Endi Germaniya, boshqa narsalar qatori, mudofaa xarajatlarini YaIMning 2,1 foizigacha oshiradi - buni NATO standartlari talab qiladi. Berlinning Kiyevni qo‘llab-quvvatlashi ham Rossiya-Ukraina urushi boshlanganidan beri eng keng ko‘lamli bo‘ladi - 2022 yil 22 fevraldan 2023 yil dekabrigacha Germaniya Kiyevga taxminan 6 milliard yevro miqdorida harbiy yordam ko‘rsatdi. 

Yevropa AQShdan yordam bilan bog‘liq muammolar fonida Ukrainani qo‘llab-quvvatlamoqda

Yevropa davlatlari Kiyevni qo‘llab-quvvatlayotgan bir paytda, Ukraina AQShdan harbiy yordam olishda muammoga duch kelmoqda. Sentyabr oyida AQSh Kongressidagi Respublikachilar partiyasi vakillari Oq uyning Kiyevga 61,3 milliard dollar ajratish rejasini qo‘llab-quvvatlamagan edi. Respublikachilar ichki muammolarni hal etish - mamlakatning Meksika bilan chegarasini mustahkamlash va noqonuniy migratsiyaga qarshi kurashish uchun ham qo‘shimcha mablag‘ ajratishni talab qilmoqda. 

Dekabr oyi oxirida Qo‘shma Shtatlar Kongress tomonidan ma’qullangan so‘nggi transhni Kiyevga o‘tkazdi. Shu fonda The New York Times gazetasining yozishicha, Kiyevga yaqin orada Vashingtondan Patriot tizimi uchun raketalar yetkazib berish to‘xtatiladi.