Olimlar birinchi marta odamga butunlay mexanik yurakni ko‘chirib o‘tkazdi

Texas yurak instituti va BiVACOR insonga sun’iy mexanik yurakni implantatsiya qilish operatsiyasi muvaffaqiyatli yakunlanganini bildirdi. Bu operatsiya 2024 yil 9 iyulda AQSh oziq-ovqat va farmatsevtika idorasi (FDA) nazorati ostida klinik tadqiqot doirasida amalga oshirildi. BiVACOR tomonidan ishlab chiqilgan mexanik yurak titandan yasalgan, bir harakatlanuvchi qismga ega bo‘lgan biventrikulyar nasosdir, magnitli rotor - qonni haydaydi va ikkala qorinchani almashtiradi.

Tadqiqotchilar mexanik yurakni og‘ir yurak yetishmovchiligi (univentrikulyar yoki biventrikulyar) bo‘lgan bemorlar uchun «transplantatsiya uchun ko‘prik» deb atashadi. Ya’ni, bu vaqtinchalik yechim bo‘lib, bemor to‘laqonli donor yurakni kutayotganda implantatsiya qilinishi mumkin. Texas tibbiyot markazida amalga oshirilgan birinchi implantatsiyadan so‘ng, tadqiqotga yana to‘rtta bemorni o‘z ichiga olgan ko‘proq transplantatsiyalar amalga oshiriladi. 

«Texas yurak instituti BiVACOR’ning birinchi mexanik yurak implantatsiyasidan juda xursand. Yurak yetishmovchiligi butun dunyo bo‘ylab o‘limning asosiy sababi bo‘lib qolayotganligi sababli, BiVACOR yechimi yurak transplantatsiyasini kutayotgan son-sanoqsiz bemorlarga umid nurini beradi», dedi Texas yurak instituti prezidenti va bosh direktori, doktor Jozef Rojyers. 

BiVACOR mexanik yuragi ko‘pchilik erkaklar va ayollar uchun mos keladi. Kichkina o‘lchamiga qaramay, u jismoniy mashqlar bilan shug‘ullanadigan katta yoshli erkak uchun yetarli quvvatni ta’minlay oladi. Mexanik yurak bir harakatlanuvchi qismga ega noyob nasosga ega: ikkita alohida nasos kamerasida joylashgan chap va o‘ng qanotli ikki tomonlama magnit osilgan rotor. Bu nasos qonni o‘pka va aortaga olib keladigan ikki tomonlama markazdan qochma g‘ildirak hosil qiladi. Mexanik yurakda klapanlar yoki kameralar yo‘q, MAGLEV nasos rotorini tez aylantirish orqali pulsatsiyalanuvchi chiqish imkonini beradi.