Bayden hozircha Ukrainani NATOga taklif etishga chaqirmaslikka qaror qildi

Oq uy Ukrainani NATOga a’zo bo‘lish uchun rasmiy taklif qilishga oshkor chaqiriq bilan chiqmoqchi edi, ammo bunday qilmaslikka qaror qildi. Bu haqda Bloomberg 23 noyabr, shanba kuni yozgan. Unga ko‘ra, amaldagi prezident Jo Bayden ma’muriyati «qisqa muddatda muvaffaqiyat qozonish ehtimoli pastligini hisobga olib,» bunday ramziy chaqiriq g‘oyasidan voz kechgan. Buning o‘rniga, deb yozadi Bloomberg, Ukrainaga shunday kafolatlar beradigan ikki tomonlama xavfsizlik kelishuvlarini ishlab chiqish rejalashtirilmoqda.

Agentlik qayd etishicha, «Bayden Ukraina prezidenti Volodimir Zelenskiyga Donald Trampning 2025 yil 20 yanvarga rejalashtirilgan inauguratsiyasi oldidan imkon qadar kuchli yordam ko‘rsatishga harakat qilmoqda». Oq uy tomonidan qabul qilingan eng muhim qarorlardan biri Ukrainaga Rossiya hududidagi harbiy nishonlarga uzoq masofali G‘arb qurollari bilan zarba yo‘llash uchun berilgan ruxsatdir. Bundan tashqari, Braziliyada o‘tkazilgan G20 sammitida Bayden Ukraina suvereniteti va hududiy yaxlitligini qo‘llab-quvvatlashga chaqirdi.

AQSh allaqachon Ukrainaga 64 mlrd dollardan ortiq harbiy yordam bergan

Oq uy va Pentagon AQSh Kongressi tomonidan Ukraina mudofaasi uchun ajratilgan so‘nggi taxminan 9 milliard dollarni (8,3 milliard yevro) sarflashga shoshilmoqda, deb yozadi Bloomberg. Davlat departamentiga ko‘ra, Qo‘shma Shtatlar allaqachon Ukrainaga 64 milliard dollardan ortiq harbiy yordam bergan.

«Prezident Bayden hozirdan 20 yanvargacha bizda mavjud bo‘lgan har bir dollar eshikdan tashqariga chiqib ketishini ta’minlashga intiladi», dedi davlat kotibi Entoni Blinken noyabr oyi boshida NATO shtab-kvartirasida jurnalistlarga Trampning inauguratsiya sanasiga ishora qilib. Blinkenning qo‘shimcha qilishicha, Oq uyning amaldagi ma’muriyati Ukrainaga «uning uchun zarur bo‘lgan havo mudofaasi, artilleriya va zirhli texnika» berilishini kafolatlaydi.

Biroq, agentlikning ta’kidlashicha, Baydenning Ukrainaga qurol-yarog‘ yetkazib berishni ko‘paytirish imkoniyatida chegaralar bor, chunki qolgan pulning katta qismi faqat Pentagon zaxirasida mavjud bo‘lgan qurollar uchun ishlatilishi mumkin va ularni haddan tashqari qisqartirish AQShning o‘z mudofaa qobiliyatini xavf ostiga qo‘yishi mumkin.

AQSh Ukrainaga yangi harbiy yordam ajratilishini e’lon qildi

Qo‘shma Shtatlar Rossiya agressiyasidan o‘zini himoya qilayotgan Ukrainaga 275 million dollarlik qurol va harbiy texnikadan iborat qo‘shimcha yordam paketini taqdim etmoqda. Bu haqda 20 noyabr kuni AQSh davlat kotibi Entoni Blinken bayonot berdi. Avvalroq AP agentligi manbalarga tayanib, Vashingtonning Kiyevga yana 275 million dollarlik harbiy yordam paketini taqdim etish rejalari haqida qo‘shimcha ma’lumot bermasdan yozgan edi.

Aniqlik kiritilishicha, Ukrainaga navbatdagi yordam paketining ajratilishi AQSh prezidenti Jo Bayden 26 sentabr kuni – Ukraina prezidenti Volodimir Zelenskiy bilan Oq uyda uchrashuvi arafasida e’lon qilgan ushbu mamlakatga yordamni kengaytirish doirasida amalga oshirilmoqda. 

O‘shanda Bayden AQSh Mudofaa vazirligiga Kongress tomonidan ma’qullangan mablag‘lar hisobidan Ukrainaga 5,5 milliard dollar miqdorida yordam yo‘naltirishni buyurdi, shunda uning ma’muriyati prezidentlik muddati tugagunga qadar «Kongress tomonidan ajratilgan mablag‘lardan to‘liq foydalanishi mumkin».

Shu kuni, 26 sentabrda Oq uy Pentagon Ukraina xavfsizligiga ko‘maklashish tashabbusi doirasida Kiyevga 2,4 milliard dollar ajratishini ma’lum qildi.