Berlin: Gurjiston uchun YeIga eshik ochiqligicha qolmoqda

«Germaniya hukumati Gurjistondagi voqealarni katta xavotir bilan kuzatib bormoqda va agar mamlakat muzokaralar yo‘liga qaytishga qaror qilsa, Yevropa Ittifoqiga eshik ochiq qoladi», — deyiladi 29 noyabr, juma kuni Germaniya Tashqi ishlar vazirligi rasmiy vakili Kristian Vagnerning DW muxbiri so‘roviga javobida.

«Tbilisidagi norozilik namoyishlariga kelsak, ulardan ko‘rinib turibdiki, mamlakat aholisining ko‘pchiligi hukumat yo‘nalishini qo‘llab-quvvatlamaydi va aholining katta qismi Yevropa Ittifoqiga kirishni xohlaydi. Ularning talablari qo‘llab-quvvatlanib, huquq-tartibot idoralaridan vazminlik va zo‘ravonlik qilmaslikni kutamiz», — deya qo‘shimcha qildi Vagner.

Tbilisidagi namoyishchilar barrikadada qolmoqda

30 noyabr kuni ertalab Tbilisidagi namoyishchilar Shota Rustaveli xiyobonida qolmoqda va barrikadani mustahkamlamoqda, deb xabar qilmoqda gurji jurnalistlar. Namoyishchilar o‘t yoqib, vaqti-vaqti bilan: «Sakartvelo!» deya hayqirmoqda. Ulardan ba’zilari Gurjiston va Yevropa Ittifoqi bayroqlarini hilpiratmoqda, deb xabar beradi BBC Britaniya media kompaniyasi muxbiri.

«Politsiya kutmoqda. To‘siqni kuchaytirish davom etmoqda va uning orqasida suv purkagichdan yashirinish mumkin, lekin juda ko‘p odamlar bor», deya yozgan jurnalist Vladimir Romenskiy.

Kecha kechasi Gurjiston poytaxtida o‘n minglab odamlar ishtirokidagi ommaviy muxolifat namoyishlari qayta boshlandi. Avvaliga namoyishchilarning asosiy qismi parlament binosi yonida shiorlar aytib, Shota Rustaveli nomidagi markaziy xiyobonni to‘sib qo‘ygan, biroq keyin vaziyat keskinlashgan. Namoyishchilar politsiyaga qarata petarda va bo‘yoq butilkalarini uloqtirib, parlament binosi darvozasini qo‘lbola buyumlar bilan taqillatib, yon darvozalarni sindirishga urina boshladi.

Gurjiston Ichki ishlar vazirligi namoyishchilar infratuzilmaga zarar yetkazgani va yong‘inlar boshlagani sababli miting «qonun doirasidan tashqariga chiqqanini» aytdi. Parlamentning kirish eshiklari shikastlangan, deyiladi Ichki ishlar vazirligi xabarida.

Namoyishchilarning harakatlariga javoban politsiya suv purkagichlar va qalampir gazidan foydalangan, qo‘lga olishlar boshlangan. Namoyishchilar parlament binosidan siqib chiqarildi, biroq ularning bir qismi Rustaveli prospektida qolmoqda. Ular o‘rindiqlar va chiqindi qutilaridan barrikadalar qurishga harakat qilmoqdalar. Namoyishchilar va xavfsizlik kuchlari orasida jabrlanganlar bor.