Молия вазирининг биринчи ўринбосари тайинланди

Омонулло Забиҳуллаевич Насриддинхўжаев Ўзбекистон Республикаси Молия вазирининг биринчи ўринбосари этиб тайинланди. Бу маълумот Kun.uz манбаси томонидан тасдиқланди.

Омонулло Насриддинхўжаев шу вақтгача президентининг иқтисодиёт тармоқларини ривожлантириш, инвестициялар ва ташқи савдо сиёсатини амалга ошириш бўйича маслаҳатчиси ўринбосари лавозимида фаолият юритиб келаётганди.

У 1971 йилда Тошкент шаҳрида туғилган,  миллати ўзбек, маълумоти олий. 1994 йилда Тошкент Давлат университетини, 2002 йилда Италиядаги «SDA Bocconi» менежмент мактабини тамомлаган, шунингдек, 2016 йилда Ҳарвард Бизнес мактаби илғор менежмент дастурини тамомлаган. У турли йилларда Алишер Усмонов бошқарувидаги USM Holdings таркибидаги компанияларда фаолият кўрсатган. 

Эслатиб ўтамиз, 24 февраль куни Молия вазирлигининг собиқ раҳбари Жамшид Қўчқоров Иқтисодиёт ва саноат вазири лавозимига ўтказилган, вазирлик раҳбарлигига шу вақтгача вазирнинг биринчи ўринбосари сифатида ишлаб келаётган Тимур Ишметов тайинланганди.