Элдор Арипов: «Биз Афғонистонда тинчлик ўрнатилишига ҳар қачонгидан яқинмиз»

«Биз Афғонистонда тинчлик ўрнатилишига ҳар қачонгидан яқинмиз. Албатта, у ерда эртага тинчлик ўрнатилади демоқчимасман. Фикримча, жуда муҳим трансформация юз берди. Биз биринчи марта бу мамлакатдаги тинчлик имконияти ҳақида гапира бошладик. Тинчлик истиқболи ҳақида Афғонистоннинг қўшнилари ҳам, мамлакат ичидаги фракциялар ҳам гапирмоқда», – деди Арипов Афғонистон бўйича онлайн-анжуманда.

Унинг сўзларига кўра, бугун томонлар «ҳарбий мавсум бошланишини эмас, тинчлик келишувлари ва асирлар алмашиш бўйича музокаралар қачон бошланишини» муҳокама қилмоқда.

Афғонистонда тинч ҳаётнинг изга тушиши минтақалараро савдо салоҳиятини йўлга қўйиш имконини беради, деб қўшиб қўйди Арипов.

«Тинчлик истиқболи Афғонистоннинг Марказий ва Жанубий Осиёни боғловчи азалий транспорт-коммуникация салоҳиятидан фойдаланиш имкониятини беради. Афсуски, 20-асрда мамлакат геосиёсий буферга айланиб қолиши оқибатида у бу жараёнлардан узилиб қолганди. Тинчлик истиқболи унинг бу роли тикланганини айтишга имкон беради. Бу Марказий Осиё учун жуда муҳим», – деб таъкидлади у.