Навоийда янги шаҳарча қурилишига тамал тоши қўйилди

Навоийда Янги Навоий шаҳарчаси қурилишига тамал тоши қўйилди. Навоий вилояти ҳокими Нормат Турсунов, сектор раҳбарлари, нуронийлар, кенг жамоатчилик вакиллари иштирокида ўтказилган тадбирда шаҳарча лойиҳаси тақдимоти ўтказилган. Бу ҳақда Kun.uz’га вилоят ҳокимлиги матбуот хизмати раҳбари Шоҳира Рауфбоева маълум қилди.

Лойиҳа Кармана туманидан Навоий шаҳрига ўтказилган ҳудуд – Ёшлик маҳалласида амалга оширилмоқда. Шаҳарчанинг умумий майдони 1097,6 гектарни ташкил этиб, биринчи босқичда 450 гектар ер майдонида қурилиш ишлари бажарилиши режалаштирилган.

Лойиҳа Навоий вилояти ҳокимлиги ҳузурида амалга оширилади. Бунинг учун “Янги Навоий шаҳарчаси” ишбилармонлик маркази дирекцияси” давлат муассасаси ташкил этилган. 

Шаҳарчада “Янги Ўзбекистон” боғи ва маданий дам олиш сайилгоҳлари, Навоий давлат педагогика институтининг янги бинолари (кампус типида) ва бошқа ижтимоий соҳа объектлари, кўп қаватли тураржойлар, тадбиркорлик ва ишбилармонлик, маиший хизмат кўрсатиш ва сервис объектлари бўлади. Шунингдек, ҳудудда кутубхона, сунъий кўл ва ҳунармандчилик устахоналари бунёд этилади.

Қурилиш ишлари Хитой, Туркия ва маҳаллий қурилиш компаниялари томонидан амалга оширилмоқда. Ҳозир e-auksion.uz платформаси орқали 20 га яқин лотлар хариди эълон қилинган.