Каллас: Европа Украинани қўллаб-қувватлашда АҚШ ўрнини эгаллашга тайёр

Агар Доналд Трамп АҚШ президенти лавозимини эгаллаганидан сўнг Вашингтон фаолликни камайтирса, Европа давлатлари Украинани Россия агрессиясидан ҳимоя қилишда қўллаб-қувватлаш борасида АҚШ ўрнини эгаллашга тайёр. Бу ҳақда Европа Иттифоқининг ташқи ишлар ва хавфсизлик сиёсати бўйича олий вакили Кая Каллас 9 январ, пайшанба куни Германиянинг Рамштайнида бўлиб ўтган Украина бўйича алоқа гуруҳи йиғилиши чоғида DW мухбирининг саволига жавоб берар экан, айтиб ўтди.

«Рамштайн Украинани қўллаб-қувватлаш учун ажойиб формат эди ва Америка бу форматнинг бир қисмидир. Шунинг учун менимча, ҳозир бизда бу формат давом этмаслиги ҳақида ҳеч қандай далил йўқ, - деди у инглиз тилида. - Агар у бўлмаса, кейинроқ муҳокама қиламиз. Ўйлайманки, Европа давлатлари бу ҳолатда фаол ўринни эгаллашни истайди ва биз Украинани қўллаб-қувватлаш учун бу форматни давом эттирамиз».

Бу борада у қанчалик оптимистик экани ҳақидаги кейинги саволга жавобан Каллас шундай деди: «Европа давлатларида буни давом эттириш (Украинани Рамштайн форматида қўллаб-қувватлаш бўйича иш) учун албатта ирода бор. Умид қиламанки, улар қандай ечим топишларини кўрамиз».

Шу куни журналистлар билан суҳбатда Каллас ҳозирги босқичда АҚШнинг Украинани келажакда қўллаб-қувватлаши ҳақида ҳеч қандай тахмин бўлмаслиги кераклигини таъкидлади. «Қўшма Штатлар Европада муҳим манфаатларига эга», аммо «Россия дунёдаги энг қудратли кучга айланиши Қўшма Штатлар манфаатларига мос келмайди», деб тушунтирди у. «Шундай экан, янги (АҚШ) раҳбарияти иш бошлаганида, улар тўлиқ вазиятни кўра олишларига ишонаман», — дея қўшимча қилди Каллас.

Мелони: РФ миграциядан ЕИга путур етказиш учун фойдаланиши мумкин

Россия нафақат ҳарбий соҳада, балки Москва Европа ҳамжамиятининг бирлигини бузиш учун ноқонуний миграция ва бошқа механизмлардан фойдаланиши мумкинлиги сабабли ҳам ЕИ хавфсизлигига катта таҳдид солмоқда. Бу ҳақда 22 декабр куни Италия бош вазири Жоржа Мелони маълум қилди. Унинг сўзларидан Reuters иқтибос келтирди.

Финландия Шимолий ва Ўрта Ер денгизи минтақаларидаги хавфсизлик ва Жанубий Европадаги миграция масалаларини муҳокама қилиш учун Италия, Швеция ва Греция раҳбарлари ҳамда Европа Иттифоқининг ташқи ишлар ва хавфсизлик сиёсати бўйича олий вакили Кая Калласни шимолий Лапландияда қабул қилди.

«Биз таҳдид тасаввур қилганимиздан анча кенгроқ эканлигини тушунишимиз керак», деди Мелони матбуот анжуманида.

Унинг фикрича, Украинадаги уруш тугаганидан кейин Россиядан ЕИ хавфсизлигига таҳдид йўқолмайди ва Брюссел бунга тайёр бўлиши керак.

«Гап демократиямиз, жамоатчилик фикрига таъсири ҳақида кетяпти, бу Африкада содир бўлаётган нарсалар, хомашё, миграция воситалари билан боғлиқ, биз хавфсизлик тушунчаси жуда кенг эканлигини тушунишимиз керак», деди Италия вазирлар маҳкамаси раҳбари.

Швеция бош вазири Улф Кристерссон, ўз навбатида, ноқонуний миграция Европанинг шимоли ва жануби учун умумий муаммо эканини аниқлаштирди.