Озарбойжон Сербияга газ етказиб беришни тўхтатди

Озарбойжон 11 январ куни эрталаб Сербияни «Шоҳденгиз» конидаги муаммо туфайли газ етказиб беришни тўхтатиши ҳақида хабардор қилди. Бу ҳақда мамлакат президенти Александр Вучич АҚШ давлат котиби ўринбосари Ричард Верма билан ўтказилган музокаралардан кейинги брифингда хабар берди.

Қайд этилишича, Озарбойжон Белградга энди кунлик 1,7 миллион метр куб газни етказиб бера олмайди.

«Газ етказиб берилиши қачондан бошланиши аниқ эмаслиги айтилди. Буни серб тилига таржима қилиб айтадиган бўлсам, қадрдон халқим, биз бугундан бошлаб ўз захираларимизни кўпроқ ва тезроқ сарфлашни бошлаймиз», — дейди Вучич.

Сербия президенти Озарбойжон томони юзага келган муаммони бир-икки ойда бартараф этишига умид билдирган. «Агар бу амалга ошмаса, яқин тўрт ойда 2-3 миллион захирамизни сарфлашга тўғри келади», — дея таъкидлайди у.

Озарбойжон томонининг маълум қилишича, Shak Deniz Alpha (SDA) платформаси ва Сангачал терминали ўртасидаги сувости конденсат экспорти тармоғида техник носозлик аниқланган бўлиб, уни бартараф этиш ишлари олиб борилмоқда.

7 январ куни Озарбойжон техник сабабларга кўра, Болгариянинг «Булгаргаз» давлат компаниясига табиий газ етказиб беришни вақтинча тўхтатган эди.

Вучич Верма билан қатор масалаларни, жумладан, АҚШнинг Naftna industrija Srbije (NIS) — Болқондаги энг йирик энергокомпанияларидан бирига нисбатан санкцияларни муҳокама қилган. Ушбу компания акцияларининг 50 фоизи «Газпромнефт»га тегишли. Аввалроқ «Газпромнефт» ва NIS Вашингтон санкцияларига учраган эди.