Германия Киевга 2024 йил учун якуний ҳарбий ёрдам пакетини топширди

Германия ҳозирда 2024 йилда тасдиқланган охирги ҳарбий ёрдам пакетларидан бирини ўзини Россия босқинидан ҳимоя қилаётган Украинага узатмоқда. Бу ҳақда Германия мудофаа вазири Борис Писториус 14 январ, сешанба куни Киевда DW мухбирининг саволига жавобан айтиб ўтди.

Германия вазирининг сўзларига кўра, ушбу пакет доирасида Киев Leopard 1А5 асосий жанговар танклари, Мардер пиёдалар жанговар машиналари, бронетранспортёрлар ва бошқа қуролларни олади. Писториус, шунингдек, Украинанинг ҳамкорлари бутун дунё бўйлаб Leopard 1 танкларини сотиб олаётганига, сўнг улар турли компаниялар томонидан таъмирланиб, Украина Қуролли кучларига топширилаётганига эътибор қаратди.

«Бу мумкин бўлса, бу содир бўлади», деб қўшимча қилди Писториус. Шу билан бирга, Leopard 2А4 танклари аллақачон Украинага етказилган, деди у.

Писторус Украинага ҳарбий ёрдамни ошириш ҳақида

Ўша куни эрталаб Борис Писториус Киевда Германия расмийлари Полша, Франция, Италия ва Буюк Британия билан АҚШда ҳокимият алмашганидан кейин Украинага ҳарбий ёрдамни ошириш масаласини муҳокама қилаётганини айтди. «Бешлик гуруҳи»нинг биринчи йиғилиши ўтган йилнинг ноябр ойида Берлинда бўлиб ўтган, кейингиси эса Парижда бўлиб ўтади, деди у.

Муҳокаманинг асосий йўналишлари қаторида у Украинадаги мудофаа қўшма корхоналари имкониятларини кенгайтириш, Европа давлатлари ва Украина ўртасидаги ҳамкорлик даражасини ошириш, бир-биридан илғор тажрибаларни ўзлаштиришни қайд этди.

Ўз навбатида, Украина президенти Володимир Зеленский Украина ўзини ҳимоя қилиш орқали Европани, умумий қадриятларни, демократия ва эркинликни ҳам ҳимоя қилаётганини таъкидлади. «Ҳарбий хизматчиларимиз қайси жойда бўлишидан қатъи назар, ҳаммани ҳимоя қилади. Менимча, бу энг муҳими. Ва ўйлайманки, эртага ўзимизни қандай ҳимоя қилиш ҳақида ўйлашимиз керак», деди у.