Dramalar Superligasi: Yettinchi turdan keyingi xulosalar

7-tur ham poyonladi. Ko‘z tegmasin, Superligamiz qiziyapti. Coca cola ichib ko‘radigan o‘yinlar bo‘lyapti ammo. Hatto o‘rtamiyona deb qaralgan klublar ham jangovar o‘yin taqdim etishayotgani quvonarli hol.

7-turning e'tiborga molik jihatlarini kuchli yettilikka qo‘yib ko‘rdim, yomon narsa chiqmadi lekin.

7. Qosimov o‘rnidan turdi...

Qator omadsizliklardan so‘ng OKMK g‘alaba qozondi va xavfli hududni tark etdi. Mirjalol Qosimovning tarkibdagi o‘zgartirishlari olmaliqliklarga qo‘l keldi va oxirgi turlarda o‘ziga kela olmayotgan «Surxon» mag‘lub etildi. Dastlabki turlarda yaxshi natijalar qayd etgani uchun ham hozircha termizliklar 8-o‘rinda borishmoqda, agar tezroq uyg‘onishmasa, bu kunlari ham orzu bo‘lib qoladi. «Surxon» bilan OKMK o‘rtasida faqatgina «Qizilqum» joy olgan.

6. «Bunyodkor» to‘xtatildi

Qaysi «Qizilqum» deyapsizmi – yetakchilar uchun-da bosh og‘rig‘i bo‘layotgan, turnir jadvalidagi ishlarga-da e'tibor bermay, o‘z o‘yinini o‘ynayotgan «Bunyodkor»ni to‘xtatgan navoiyliklar! Ha, ular «Abramov shaykasi»ni to‘xtatishdi. «Bunyodkor» shu o‘yinga qadar yutqazsa-da gol urayotgandi. «Qizilqum» bilan esa Abramovning rejalari ish bermadi.

To‘g‘ri, yagona gol penaltidan urildi, ammo bu yerda Aktamov shogirdlarining matonatli ishi to‘p kiritishlarida emas, balki gol o‘tkazmasligida...

Keyingi turda poytaxtga Toshkentda ochko olishni yaxshi biladigan «Qo‘qon 1912» keladi va bu bahs ko‘p ehtimol bilan «Milliy» stadionining ochilishiga to‘g‘ri keladi. Maydon tekis bo‘lsa, rohatlanib ketsa kerak «bolalar»ning, biroq vodiyliklarning ham ishtahasi ochilgan-da. Demak, hozirdanoq zo‘r to‘qnashuvga taraddud ko‘ramiz.

5. Qarshidan benefis davom etadi

«Buxoro» - «Nasaf» o‘yinidagi natijadan so‘ng, bir buxoroliklarga achinsak, bir qarshilik yosh yigitlarning yana o‘z o‘yinlarini topib olishganidan xursand bo‘lamiz. «Nasaf» «Paxtakor»ga qarshi zo‘r o‘yin ko‘rsatib, keyin o‘sha harakatlarini yo‘qotib qo‘ygandi go‘yo. OKMKni «yanchib tashlagach» esa, Ro‘ziqul Berdiyev shogirdlarida o‘zlariga bo‘lgan ishonch paydo bo‘ldi va bu safargi qurbon – «Buxoro»...

Ashurmatov shogirdlariga o‘zlariga kelib olishlari uchun turnir jadvalidagi o‘rinlarini ko‘rsatish bilan kifoyalanamiz – 12-o‘rin, agar ikki jamoa qo‘shilmaganida, oxirgi o‘rin, degani bu :)

4. Azaliy raqiblar

«Paxtakor» OChLdagi o‘yiniga taqalib qolgani uchun PFLdan «Metallurg» bilan bo‘lgan o‘yinini ikki kun oldinga surib berishni iltimos qildi. PFL ham «boshqa klub bo‘lsa ham mayli edi, ikkinchi tarkib bilan bemalol o‘ynab, asosiy tarkib yigitlariga dam bersanglar bo‘ladiku», deb o‘tirmadi, Osiyo miqyosidagi o‘yinga putur yetmasin, deyishdi.

Bekobodliklar esa, kutilmaganda, haqiqiy jang berishdi. Lobanov va himoyadagi sheriklari penalti berilgan paytda hakamga qarshilik ko‘rsatishayotganini ko‘rdingizmi, o‘hh, bu axir haqiqiy shiddat-ku deb yubordi hamma. Lekin dilni tirnagan joyi ham bo‘ldi-da ushbu o‘yinning – turning eng chiroyli golini yo‘llagan Isoqjonov o‘sha golini maza qilib nishonlashga ulgurmay, paxtakorchilar hisobni tenglashtirib kelishdi. Nima bo‘pti, deysizmi, axir, gol shedevr chiqqanidan takroriy lavhaga berili-i-iib ketibmiz, shekilli, Masharipov bekobodlik himoyachilar ichidan be-ye-yemalol kirib borib, bo‘sh turgan Cheranga to‘pni uzatganini va bolqonlik futbolchi o‘rtadagi farqni yo‘qotganini faqatgina takroriy lavhada ko‘rdik.

Maydon egalarining penaltidan kiritgan to‘pini asl holida ko‘rdik. Chunki undan oldin shedevr sodir bo‘lmagandi.

3. Bu voqea Qo‘qonda bo‘l(ma)gan edi

Baribir Qo‘qonda o‘tishi kerak o‘yin deb qabul qildik buni. Vodiylik futbolchilar o‘nlab imkoniyatlarini boy bergan uch karra chempionni o‘yin oxirida jazolashdi. Hasan Ro‘ziyev belgilagan penalti No‘'mon Hasanov shogirdlari foydasiga bo‘ldi.

O‘sha kuni Murod Holmuhammedov o‘ynamagani uchun qo‘qonliklar xavotir olishgandir, yo‘q, yo‘q, Murod boshqalarga ham o‘rgatib qo‘ygan ekan o‘n bir metrdan gol urishni: «Bilib bo‘ladimi, har xil vaziyat bo‘lib turadi...»

Bu durang «Paxtakor»ga birinchi turdayoq chempion bilan o‘rtada vujudga kelgan farqni yana tiklab berdi: uch ochko!

2. Drama ssenariysi o‘zgarmadi

Chempionlik uchun kurashayotgan klublarning bu yettiligimiz yuqorisidan o‘rin olishga haqlari yo‘q edi baribir: biri «Metallurg»ni yenggani, ikkinchisi «Qo‘qon 1912»ga ochko ulashgani bilan bu sharafga noil bo‘la olmasdi.

Turning eng qiziqarli bahsiga e'tibor qaratsak, u Andijonda bo‘ldi: «Andijon» – «Dinamo».

Ushbu uchrashuv bir hafta muqaddam Samarqandda kechgan o‘yinning dramasini qaytarib berdi, desak mubolag‘a bo‘lmas. Yo‘q, ikki uchrashuvni ham men sharhlaganim uchun aytmayapman bu gapni, balki ko‘p holatda yaqinliklar bor ekan: 6-tur o‘yinida ham mehmonlar hisobni ochishgandi, tanaffusga qadar mezbonlar ikki gol bilan javob berishgandi. Ikkinchi bo‘limda mehmonlar jiddiy kurashib muvozanatni qaytadan tiklab, tabloga 2:2 degan chiroyli hisobni taqdim etishgan.

Andijonda ham shunday bo‘ldi: tarkibida muammolari bor «Dinamo» o‘yinni qanday boshlagan bo‘lsa, shu taxlit yakunlab berdi. Oraliqdagina «Andijon»ning zo‘r harakati va chiroyli gollarini ko‘rdik. Boshqacha hisob qayd etilganda ham adolatsizlik bo‘lardi: jangovar durang deb shunaqa o‘yinlarni aytishsa kerak...

1. Kechirasizlar, men qanday qilib Yevropaga tushib qoldim?!