«OKMKni ishonchli boshqaruvga berishdek xatoni boshqa takrorlamaslik kerak» - Otabek Bakirov

«O‘tayotgan hafta O‘zbekistonning asosiy eksport tovarlari hisoblangan oltin va mis uchun judayam qulay keldi.

Oltin unsiyasi hafta davomida deyarli 4 foizga qimmatlab, 1830 dollarga, misning tonnasi esa hafta davomida 5 foizdan ko‘proqqa qimmatlab 10425 dollarga yetgan. Misning narxi oxirgi 15 yildagi maksimumdir. Turli prognozlarga ko‘ra, mis narxi yaqin yillarda 20 000 dollarga chiqishi aytilmoqda.

Oltin O‘zbekistonning boshidagi toj – Navoiy kon-metallurgiya kombinatining, mis esa mamlakatning ikkinchi tayanchi Olmaliq kon-metallurgiya kombinatining asosiy mahsuloti.

O‘tgan yillar davomida OKMKni ishonchli boshqaruvga berish bo‘yicha achchiq tajribaga ega bo‘ldik.

Bu yo‘qotishlar va xato tajriba oxirgisi bo‘lsin. Chetdan kirib kelgan va mamlakatniyam sotib yuborishga tayyor bo‘lgan yebto‘ymas oligarxiya turli yo‘llar bilan bu ikki kombinatni qo‘lga kiritishga anchadan buyon ko‘z tikib, tamshanib yotibdi. Gibrid urinishlar to‘xtagani yo‘q. Rangli metallar narxi oshib borayotgani bu urinishlarni yana faollashtiradi.

NKMK va OKMKning qo‘ldan ketishi mamlakatning siyosiy va iqtisodiy mustaqilligini quruq fasadga aylantiradi. Mustaqil pul-kredit siyosati, budjet barqarorligi haqida unutishga to‘g‘ri keladi. Barcha masalalar bo‘yicha mamlakat tashqi boshqaruv sub'yektiga aylanadi, qo‘yadi», – deya xavotir bildirgan iqtisodchi.

Ma'lumot o‘rnida, 2017 yilda «Olmaliq KMK», «O‘zmetkombinat» va «O‘zikkilamchiranglimetall» AJlar boshqaruvi «SFI Management Group»ga topshirilgandi. 2021 yil 17 fevraldan ushbu kelishuvlar bekor qilindi.

Aprel oyida esa «SFI Management Group» «Yoshlik-I» konini o‘zlashtirish» investitsiya loyihasini amalga oshirish bo‘yicha ishtirokchilar ro‘yxatidan chiqarildi.