Qozog‘istonda Hyundai Creta va Accent avtomobillarini yig‘ish to‘xtatildi

Hyundai Trans Kazakhstan zavodi Hyundai Creta krossoverlari va Accent sedanlarini yig‘ishni vaqtinchalik to‘xtatdi. Bu haqda kompaniya saytida xabar qilindi.

«Geosiyosiy vaziyat sababli bahorda Rossiyadan butlovchi qismlar kelishi to‘xtagandi. Korxona o‘tgan vaqt davomida zaxira bilan ishladi hamda Hyundai Motor Company bilan butlovchi qismlarni boshqa mamlakatlardan yetkazib berish bo‘yicha kelishuvga erishdi. Hozirda yetkazib berishni davom ettirish va yangi logistika zanjiri masalasi hal qilinmoqda», — deyiladi kompaniya bayonotida.

Qayd etilishicha, yaqin vaqt ichida butlovchi qismlarning yetib kelishi kutilmayapti. 

Dilerlar Creta yoki Accent avtomobili sotib olish uchun navbatda turganlarga Hyundai kompaniyasining boshqa modeliga navbatga yozilishni taklif qilmoqda.