Ochilish marosimi, Masharipovlar, ikki debyutant. Hujumchisiz O‘zbekiston 3ta gol urgan o‘yindan sara fotosuratlar

Milliy jamoalar o‘rtasida ilk bor o‘tkazilayotgan CAFA Nations Cup'da (Markaziy Osiyo Kubogi) A guruhi bahslariga start berildi. 

Ochilish marosimida salyutlar otilgan turnirning 1-turini mezbon O‘zbekiston musobaqaga mehmon sifatida taklif etilgan Ummonga qarshi o‘tkazib, javobsiz 3ta to‘p kiritdi (3:0). Shu kuni jamoani sardor sifatida boshlab tushgan Jaloliddin Masharipov birinchi bo‘limda dublga erishgan bo‘lsa, ikkinchi bo‘lim so‘ngida Hojiakbar Alijonov Hojimat Erkinovning uzatmasidan so‘ng chiroyli gol urdi.

Bosh murabbiy Srechko Katanets bellashuvni nominal markaziy hujumchisiz boshladi va shunga qaramay, jamoa ishonchli g‘alabaga erishdi. Tarkibda faqat bir hujumchi — Bobur Abduxoliqov bor edi, ammo u ham zaxirada qoldirildi. Klublari ixtiyorida bo‘lib turgan Eldor Shomurodov va Igor Sergeyev esa milliy jamoaga endi qo‘shilishadi.

Bu o‘yinda O‘zbekiston U-20 vakillari Abbos Fayzullayev va Abduqodir Husanov milliy jamoadagi debyutlarini o‘tkazishdi.

O‘zbekiston 1-turdan so‘ng guruh peshqadamiga aylandi, chunki ikkinchi o‘yinda Tojikiston va Turkmaniston o‘zaro durang qayd etishdi (1:1). 

«Oq bo‘rilar» 2-turda 14 iyun kuni Turkmaniston bilan o‘ynaydi.

O‘rtacha tempda o‘tgan, raqibga deyarli imkon berilmagan o‘yindan olingan sara 57ta fotosuratni tomosha qiling. 

Suratlar muallifi — Muhammadjon G‘aniyev