Ukraina BMT ekspertlari Il-76 qulagan joyni tekshirishini talab qilmoqda

Ukraina hukumati xalqaro mustaqil ekspertlar tomonidan Belgorod viloyatida Il-76 samolyoti qulagan joyni tekshirishni talab qilmoqda, hodisa oqibatida, Rossiya Federatsiyasi ma’lumotlariga ko‘ra, 65 nafar ukrainalik harbiy asir halok bo‘lgan. Oliy radaning inson huquqlari bo‘yicha vakili Dmitriy Lubinets BMT va Xalqaro qizil xoch qo‘mitasiga halokat joyini tekshirishni so‘rab murojaat qildi. «Ukraina Il-76 samolyoti halokati bo‘yicha shaffof xalqaro tergov o‘tkazilishini talab qiladi», — deb yozdi Lubinets 25 yanvar, payshanba kuni Facebook ijtimoiy tarmog‘ida.

Ombudsmanning so‘zlariga ko‘ra, u Kiyevga Rossiya ushbu tashkilotlarni harbiy asirlarni samolyotda tashigani haqida xabardor qilgani yoki qilmagani bo‘yicha ham ma’lumot berishni so‘ragan. Shu bilan birga, Dmitriy Lubinets xalqaro ekspertlar Rossiya Federatsiyasining «bayonotlari va ayblovlari»ga qaramay, «Olenovkadagi fojia holatida» bo‘lgani kabi, halokat joyini tekshirishga ruxsat berilmasligiga ishonch bildirdi.

«Harbiy asirlar uchun javobgarlik ularni ushlab turgan tomonda»

Bundan tashqari, Lubinets halokat kuni Ukraina va Rossiya Federatsiyasi o‘rtasida asirlarni almashish rejalashtirilganligini tasdiqladi. «Jyeneva konvensiyalariga ko‘ra, harbiy asirlarning hayoti va sog‘lig‘i uchun to‘liq javobgarlik ularni ushlab turganlar zimmasiga tushadi. Bundan tashqari, harbiy asirlarni olib o‘tayotgan davlat ularning xavfsizligini to‘liq ta’minlashi va asirlarning harakatlanishi to‘g‘risida XQXQga xabar berishi kerak. Bu holatda mas’uliyat Rossiya zimmasiga yuklatiladi», - deya ta’kidladi u.

Ombudsmanning so‘zlariga ko‘ra, hozirda «samolyotda ko‘p odamlar bo‘lganligi haqida hech qanday ma’lumot yo‘q». «Mening fikrimcha, bu Rossiya Federatsiyasi Ukrainaga qarshi tashviqot axborot kampaniyasini rejalashtirganiga yaqqol misoldir. Ishonamanki, dushman harbiy asirlar masalasidan Ukraina ichidagi vaziyatni beqarorlashtirish va bizning qo‘llab-quvvatlashni kamaytirish uchun foydalanishda davom etadi», - deya qo‘shimcha qildi u.

«SBU» samolyot halokati yuzasidan tekshiruv boshladi

Ayni vaqtda, Ukraina xavfsizlik xizmati (SBU) Il-76 samolyotining Belgorod viloyatida qulashi holati yuzasidan tekshiruv boshladi. Urush qonunlarini buzish moddasi bo‘yicha jinoiy ish ochildi, deb yozadi «RBK-Ukraina» va «Ukrainskaya pravda» maxsus xizmatga tayanib. Ukraina prezidenti Volodimir Zelenskiy avvalroq Kiyev Il-76 halokati bo‘yicha xalqaro tergov o‘tkazilishini talab qilishini aytgan edi.

Il-76 harbiy-transport samolyoti 24 yanvar kuni Belgorod viloyatining Korochansk tumanida Yablonovo qishlog‘i yaqinidagi dalaga qulab tushdi. Viloyat gubernatori Vyacheslav Gladkovning so‘zlariga ko‘ra, bortdagi barcha odamlar halok bo‘lgan. Telegram’dagi «Vajnyye istorii» va «ChTD» kanallari Rossiya mudofaa vazirligiga tayanib, Il-76 bortida almashish uchun olib ketilayotgan 65 nafar ukrainalik asir, shuningdek, 6 nafar ekipaj a’zosi va 3 nafar hamrohlik qiluvchi shaxs bo‘lganini ma’lum qildi. Rossiya mudofaa vazirligi halokatni «terror hujumi» deb atadi va buning uchun Kiyevni aybladi. Moskva talab qilgan BMT xavfsizlik kengashining shoshilinch majlisi 25 yanvarga belgilangandi.