Sankt-Peterburgda 24 yoshli o‘zbekistonlik yigit o‘g‘irlab ketildi 

Rossiyaning Sankt-Peterburg shahrida 24 yoshli o‘zbekistonlik yigit o‘g‘irlab ketildi. Jinoyatchilar unga qurol o‘qtalib, deyarli million rubl talab qilishgan. Bu haqda 78.ru xabar berdi. 

Qayd qilinishicha, jabrlanuvchi politsiyaga murojaat qilib, «Nord» savdo markazining avtoturargohida to‘rt kishi unga yaqinlashib, taksiga xos stikerlar yopishtirilgan mashinaga sudrab olib borib, o‘g‘irlab ketishganini aytgan. 

Ular qurol o‘qtalib, undan 800 ming rubl talab qilishgan. Yigit qo‘rqib ketgan va uyali telefonini, 20 ming rubl naqd pulni bergan, shuningdek, 40 ming rublni jinoyatchilar kartasiga o‘tkazgan. 

Shundan so‘ng jinoiy guruh jabrlanuvchini Leningrad viloyati, Novoselyye qishlog‘i yaqinida tashlab ketishgan. 

Politsiya Rossiya Jinoyat kodeksining 162-moddasi («Bosqinchilik») bilan jinoiy ish qo‘zg‘atgan. Ikki gumondor allaqachon qo‘lga olinib, politsiya bo‘limiga olib ketilgan. Ular 21 yoshli yigitlar bo‘lib, birisi Qirg‘izistondan kelgani ta’kidlanmoqda.