Rossiyalik qiz Parijdagi Olimpiya o‘yinlarida Germaniya uchun oltin medalni qo‘lga kiritdi

9 avgust, juma kuni Germaniya terma jamoasi uchun kurashgan, asli kelib chiqishi rossiyalik bo‘lgan Darya Varfolomeyeva Parijdagi Olimpiadada badiiy gimnastika bo‘yicha ko‘pkurash bahslarida oltin medalni qo‘lga kiritdi. To‘rtta mashqda shmidenlik 17 yoshli sportchi jami 142,850 ball to‘pladi va natijada Germaniyaning ushbu sport turi bo‘yicha ilk Olimpiya oltinini qo‘lga kiritdi.

Ikkinchi o‘rinni bolgariyalik Boryana Kaleyn (140,600), uchinchi o‘rinni italiyalik Sofiya Raffaeli (136,300) egalladi.

Barnaulda tug‘ilgan sportchi

Varfolomeyeva Barnaulda tug‘ilgan. Rossiyada gimnastikachi turli o‘smirlar musobaqalarida qatnashdi, uning eng yuqori yutug‘i Sibir federal okrugi chempionatida oltinchi o‘rin edi. U 2019 yilda ota-onasi bilan Germaniyaga ko‘chib o‘tgan va sport fuqaroligini o‘zgartirgan.

Varfolomeyeva jahon chempionatlarida (2022, 2023) oltita oltin, to‘rtta kumush va bitta bronza, Yevropa chempionatida (2022, 2023, 2024) ikkita oltin va uchta bronza medaliga ega. Germaniya terma jamoasiga yakkalik bahslarida 2000 yilgi Olimpiada kumush medali sovrindori belaruslik Yuliya Raskina murabbiylik qiladi.

Tokiodagi avvalgi Olimpiya o‘yinlarida 25 yil ichida birinchi marta rossiyalik gimnastikachilar shaxsiy ko‘pkurashda Olimpiya oltinini qo‘lga kirita olishmadi - o‘shanda isroillik Linoy Ashram Dina Averinadan o‘zib ketdi. Parijda rossiyalik gimnastikachilar Rossiyaning Ukrainaga hujumi tufayli Rossiya terma jamoasi Olimpiya o‘yinlarida ishtirok etishiga ruxsat berilmaganidan keyin neytral maqomda chiqishdan bosh tortdi.