Bundesbank Germaniya iqtisodiyoti uchun o‘sish prognozini pasaytirdi

Germaniya Federal banki yaqin yillardagi GFR yalpi ichki mahsuloti o‘sishi prognozini pasaytirdi. Bundan 13 dekabr, juma kuni chop etilgan Bundesbank hisoboti dalolat bermoqda.

Iyun oyida Germaniyaning asosiy emitent banki 2024 yilda 0,3 foiz, 2025 yilda 1,1 foiz va 2026 yilda 1,4 foiz real YaIM o‘sishini prognoz qilgan edi. Endi bu ko‘rsatkichlar o‘zgartirildi: 2024 yilda 0,2 foizga pasayish, 2025 yilda 0,2 foizga va 2026 yilda +0,8 foizga o‘sish. Shuningdek, 2027 yil uchun prognoz ham qo‘shilgan: o‘sish 0,7 foiz.

Germaniya iqtisodiyotida turg‘unlik sabablari

«Germaniya iqtisodiyoti nafaqat doimiy iqtisodiy qiyinchiliklar, balki tarkibiy muammolar bilan ham kurashmoqda», dedi Bundesbank rahbari Yoaxim Nagel.

Bank ekspertlari Germaniya iqtisodiyoti muammolarini energiya narxining oshishi, uglerodsiz iqtisodiyotga o‘tish, demografik o‘zgarishlar, ko‘plab mamlakatlardagi proteksionistik siyosat va xalqaro raqobat bilan bog‘laydi.

«Xususan, Xitoy nemis sanoati uchun ayniqsa muhim bo‘lgan avtomobilsozlik, kimyo va mashinasozlik kabi tarmoqlarda kuchaydi va bozordagi ulushini sezilarli darajada oshirdi», deb yozadi Bundesbank ekspertlari.