Kambag‘allikni qisqartirish va bandlik vaziriga yangi o‘rinbosarlar tayinlandi

Alisher Muratov kambag‘allikni qisqartirish va bandlik vaziri o‘rinbosari etib tayinlandi. Bu haqda O‘zA xabar berdi.

Alisher Muratov 2020 yil avgustidan 2023 yil oktyabriga qadar Qishloq qurilish banki boshqaruv raisi bo‘lib ishlagan.

U bunga qadar Biznesni rivojlantirish banki boshqaruvi raisi birinchi o‘rinbosari lavozimida faoliyat yuritib kelayotgandi.

Bundan avvalroq Xalq banki boshqaruv raisining birinchi o‘rinbosari bo‘lgan Zafar Azimov kambag‘allikni qisqartirish va bandlik vaziriga birinchi o‘rinbosar etib tayinlangandi.

Zafar Azimov Moliya institutida o‘qigan. Faoliyati davomida Markaziy bankda qator lavozimlarda ishlagan. Undan so‘ng «O‘zsanoatqurilishbank» boshqaruv raisi birinchi o‘rinbosari lavozimida ham faoliyat yuritgan.

Kambag‘allikni qisqartirish va bandlik vazirligiga 2024 yil 23 sentabrida Botir Zohidov rahbar etib tayinlangandi. Vazirning yana bir o‘rinbosari — Ra’no Turdiboyeva ushbu lavozimda 2023 yil yanvaridan buyon ishlab kelmoqda.