YeI Suriyaning yangi rahbariyati bilan aloqaga chiqdi

Suriyada Bashar Asad rejimi qulaganidan keyin Yevropa Ittifoqi bu davlatning yangi rahbariyati bilan aloqa o‘rnatmoqda. Dushanba kuni Bryusselda bo‘lib o‘tgan tashqi ishlar vazirlari yig‘ilishida Yevropa Ittifoqining tashqi siyosat bo‘yicha rahbari Kaya Kallasning aytishicha, YeIning Suriya bo‘yicha elchisi, nemis diplomati Maykl Onmaxt kun davomida Damashqda bo‘lishi kutilmoqda. Suriyadagi fuqarolar urushi paytida u Livan poytaxti Bayrutda edi.

Kallasning so‘zlariga ko‘ra, Yevropa Ittifoqi Suriyada «vakuum» paydo bo‘lishiga yo‘l qo‘ya olmaydi va shuning uchun u Yevropa Ittifoqi mamlakatlari tashqi siyosat bo‘limlari rahbarlari bilan Yevropa Suriyadagi yangi hokimiyat bilan qanday va qay darajada hamkorlik qilishi mumkinligi haqida maslahatlashmoqchi.

Yevropa Ittifoqi mamlakatlari tashqi ishlar vazirlari Yevropa diplomatiyasining yangi rahbari Kaya Kallas boshchiligida ilk bor yig‘ilishmoqda. Ularning ta’kidlashicha, Bryussel Suriyaning yangi rahbariyatidan kurdlar va nasroniylar kabi ozchiliklarni himoya qilishini kutmoqda. Bundan tashqari, Yevropa Ittifoqi Rossiyaning ikki harbiy bazasining Suriyada qolishi bilan bog‘liq tahdidlarga e’tiborni qaratmoqchi, dedi Yevropa Ittifoqining yuqori martabali rasmiysi. Rossiya yillar davomida Suriyaning hokimiyatdan ag‘darilgan prezidenti Bashar Asadni qo‘llab-quvvatlab kelgan.

Hsh hamon terrorchi guruhlar ro‘yxatida

Shu paytgacha YeI dekabr boshida Asadni hokimiyatdan ag‘dargan «Hay’at Tahrir ash-Shom» (Hsh) radikal guruhi bilan aloqada bo‘lmagan. Yevropa Ittifoqi, xuddi BMT kabi, Hshni «terrorchi tashkilot» deb e’lon qildi va unga qarshi sanksiyalar kiritdi. Asad ag‘darilganidan so‘ng Hsh Muhammad al-Bashirni o‘tish davri hukumati rahbari etib tayinladi va diplomatlarga ko‘ra, ancha mo‘’tadil pozitsiyani egallab turibdi.

Avvalroq AQSh, Buyuk Britaniya va Yevropa Ittifoqi davlatlari Fransiya va Italiya Damashq bilan o‘z diplomatik aloqalari to‘g‘risida e’lon qilgan edi.