Jo Baydenning rafiqasi Ukraina elchisidan 14 ming dollarlik to‘g‘nog‘ich olgani ma’lum bo‘ldi

AQSh prezidenti Jo Baydenning oilasi 2023 yilda xorijlik yetakchilardan o‘n minglab dollarlik sovg‘alar qabul qilib oldi. Bu haqda Davlat departamenti tomonidan e’lon qilingan yillik moliyaviy hisobotda so‘z boradi.

Sovg‘alar orasida Janubiy Koreyaning yaqinda impichment e’lon qilingan prezidenti Yun Sok Yol topshirgan 7,1 ming dollarlik esdalik fotoalbomi, Mo‘g‘uliston bosh vaziri bergan 3495 dollar turadigan mo‘g‘ul jangchisining haykalchasi ham bor. Shuningdek, AQSh prezidentining rafiqasi Jill Bayden Ukrainaning Qo‘shma Shtatlardagi elchisidan 14 ming dollarlik to‘g‘nog‘ichni qabul qilib olgan.

Ukraina yetakchisi Volodimir Zelenskiy esa o‘z navbatida prezident oilasiga 2,4 ming dollarga baholangan kollajni sovg‘a qilgan.

AQShning birinchi xonimi eng qimmat sovg‘ani Hindiston bosh vaziri Narendra Modidan qabul qilib olgan: qiymati 20 ming dollarga yetadigan 7,5 qirotli brilliant. Ushbu qimmatbaho buyum Oq uyning sharqiy qanotida qolgan: prezident oilalari qimmatli sovg‘alarni har doim bo‘lmasa-da, ko‘pincha Milliy arxivga topshiradi — ushbu buyumlar u yerda namoyishga qo‘yiladi.

Federal qonunga ko‘ra, amerikalik amaldorlar qiymati 480 dollardan oshadigan olgan barcha sovg‘alari to‘g‘risida hisobot berishlari kerak. Shu bilan birga, sovg‘ani olgan insonda uni hukumatdan bozor narxida sotib olish imkoniyati mavjud.