Ukraina Rossiyaning Donetsk oblastidagi qo‘mondonlik punktiga zarba berdi

12 yanvar, yakshanba kuni Ukraina Qurolli kuchlari Donetsk oblasti Novgorodovka shahrida joylashgan Rossiya Federatsiyasining 2-gvardiya umumqo‘shin armiyasining qo‘mondonlik punktiga "yuqori aniqlikdagi havo hujumini amalga oshirdi". Bu haqda Ukraina Qurolli kuchlari bosh shtabi Telegramʼda ma’lum qildi. Hujum tafsilotlari va uning Ukrainaning Donetsk oblasti bosib olingan hududida joylashgan rossiyalik harbiy xizmatchilari uchun oqibatlari haqida ma’lumot berilmagan. Rossiya Mudofaa vazirligi hodisa yuzasidan izoh taqdim etmadi.

Ukraina bosh shtabining bayonotida, shuningdek, amalga oshirilgan operatsiya «Donetsk yo‘nalishidagi okkupatsion kuchlarning qo‘mondonlik punktlariga bir qator zarbalarning davomi» ekanligi ta’kidlangan. «Ukraina Qurolli kuchlari dushmanning asosiy qo‘mondonlik va boshqaruv obektlari, harbiy infratuzilmalarini aniqlash va yo‘q qilishda yuqori darajadagi muvofiqlashtirish va professionallik ko‘rsatmoqda», — deyiladi xabarda.

Ukraina qurolli kuchlarining Rossiya qo‘mondonlik punktlariga qarshi so‘nggi operatsiyalari

7 yanvar kuni Ukraina Qurolli kuchlari bosh shtabi Kursk oblastidagi Belaya aholi punkti hududida Rossiyaning 810-alohida dengiz piyoda askarlari brigadasining qo‘mondonlik punktiga hujum uyushtirilganini ma’lum qildi. «Bunday hujum Ukraina mudofaa kuchlari bo‘linmalarining Rossiya Federatsiyasi hududida olib borayotgan jangovar operatsiyalarining ajralmas qismi hisoblanadi», — deya ta’kidlagan o‘shanda bosh shtab. «Ukrinform» agentligi xabariga ko‘ra, 10 yanvar kuni Ukraina qurolli kuchlari ishg‘ol ostidagi Donetsk oblasti Svetlodarsk shahridagi Rossiya Qurolli kuchlari 3-armiya korpusining qo‘mondonlik punktiga yuqori aniqlikda zarba berdi.

25 dekabrga o‘tar kechasi Ukraina qurolli kuchlari Kursk oblasti Lgov shahriga zarba berdi, deb eslatadi «Nastoyashcheye vremya» nashri. Ushbu bayonotga ko‘ra, zarba nishoni xuddi o‘sha 810-brigadaning qo‘mondonlik punkti edi. Hujumdan so‘ng Kreml tomonidan tayinlangan mintaqa rahbari vazifasini bajaruvchi Aleksandr Xinshteyn to‘rt nafar rossiyalik harbiy halok bo‘lgani va besh nafari yaralangani haqida xabar berdi. 30 dekabr kuni Ukraina qo‘shinlari Lgovga navbatdagi hujumni amalga oshirdi. Astra nashrining xabar berishicha, bir nechta raketalar rossiyalik harbiylar foydalanayotgan binoga kelib urilgan, ulardan sakkiz nafari halok bo‘lgan, yana 22 nafari jarohatlangan. "Verstka" ma’lumotlariga ko‘ra, Rossiya Federatsiyasining 810-alohida brigadasi Kursk oblastida Ukraina qo‘shinlari bilan janglarda eng katta yo‘qotishlarga duch keldi.

810-alohida brigada Sevastopolda joylashgan, deya aniqlik kiritadi NV. Rossiya Federatsiyasi va Ukraina o‘rtasida keng ko‘lamli urush boshlanganidan keyin uning harbiy xizmatchilari Melitopol, Berdyansk, Volnovaxa va Mariupol uchun janglarda qatnashdi. Nashr ma’lumotlariga ko‘ra, aynan 810-brigada tarkibida KXDR harbiylari Kursk oblastida ilk yo‘qotishlarga uchrab, Rossiya Federatsiyasi tomonida urushga kirishgan.