«Европа геосиёсат ва стратегияни унутиб қўйган»

АҚШ президенти Дональд Трампнинг Эрон ядровий битимидан чиқиш бўйича қарори шу фактни тасдиқлайдики, прогрессив Европа дунёдаги ўз обрўсини йўқотиб бормоқда. Бу ҳақда The National Interest ёзяпти.

Нашрнинг таъкидлашича, агарда Европа ўз тақдирини хавфсиз қилмоқчи бўлса, унда унга Европа идеализми ва янги реализм ўртасида мувозанатда бўлиш талаб этилади.

Куч сиёсати дунёси Европа устидан ўз таъсирини оширмоқда. Америкалик ҳарбий хизматчилар ва ядро қуроли Европани халқаро можаролардан сақлаб турган бир пайтда, европаликлар «геосиёсат ва стратегияни унутиб қўйди», дея таъкидлайди нашр.

Муаллифнинг қўшимча қилишича, Европа «тарихий реализм» етишмовчилиги туфайли АҚШ учун ўз аҳамиятини йўқотиб бормоқда.

Европалик етакчилар кўп ҳолатларда жаҳон сиёсати бўйича америкалик стратегларга қулоқ тутмоқда, бироқ Америка университетлари ҳамда таҳлил марказлари томонидан Европа ишларига қизиқиш анча пасайган.

The National Interest’нинг фикрича, Европа-Америка мулоқоти тенг ҳуқуқли бўлмагани сабабли Атлантика альянсининг келажаги хавф остида қолган.

Эслатиб ўтамиз, аввалроқ АҚШ Россиянинг НАТОга нисбатан ҳарбий-сиёсий режаларига жиддий қизиқаётгани хабар берилганди.