Евроиттифоқ Арманистондаги миссияси сонини оширмоқда

Европа Иттифоқи ва Арманистон ҳамкорликни мустаҳкамлаш устида ишламоқда ва биринчи қадам сифатида Европа Иттифоқининг Ташқи ишлар кенгаши 11 декабр, душанба куни Арманистондаги фуқаролик миссияси сонини 138 кишидан 209 кишига кенгайтиришга қарор қилди. Бу Европа Иттифоқининг чегарадаги вазиятни барқарорлаштиришга содиқлигини ва келишув жараёнига ҳисса қўшиш истагидан далолат беради, деди Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел. «Биз ҳозир минтақада тинчликка эришиш учун тарихий имконият борлигига ишонамиз. Бундай имконият пайдо бўлди ҳамда биз Арманистон ва Озарбойжон билан биргаликда бу саъй-ҳаракатларни қўллаб-қувватлашда давом этиш ниятидамиз», - деди Боррел Брюсселдаги матбуот анжуманида Европа Иттифоқи давлатлари ташқи сиёсат идоралари раҳбарларининг учрашувидан кейин.

Европа Иттифоқининг Арманистондаги фуқаролик миссияси (EUMA) 2023 йил 20 февралда иш бошлади. Бу бетараф миссия бўлиб, у фақат Арманистон ҳудудида фаолият юритади ва ҳеч қандай ижро функциясига эга эмас, дейилади Европа Иттифоқи кенгаши баёнотида. У Арманистоннинг чегарадош ҳудудларида барқарорликни таъминлаш, Арманистон ва Озарбойжон ўртасидаги муносабатларни нормаллаштириш мақсадида икки йилга мўлжалланган.

ЕИ аксарият давлатлари - Украинага ёрдамни ошириш тарафдори

Россия ҳаракатлари кучайиши фонида Брюссел Киев билан Европа Иттифоқининг Украина олдида келажакдаги хавфсизлик мажбуриятлари мавзусида эксперт маслаҳатлари шаклида мулоқотни бошлади. «Биз ҳарбий ёрдам етказишимиз ва шу билан бирга, тахмин қилинадиган узоқ муддатли молиялаштириш устида ишлашимиз керак. Бугун вазирларнинг катта қисми аниқ айтди: ҳозир Украинани қўллаб-қувватлашимизни сусайтирадиган вақт эмас. Аксинча, ҳозир буни ошириш ва тезлаштириш зарур», - деди Боррел.

Европа тинчлик жамғармасининг Киевга тўланмаган саккизинчи ҳарбий ёрдами, шунингдек, жамғармани Украина Қуролли кучлари учун мўлжалланган 5 миллиард евро миқдоридаги маблағлар билан янги тўлдириш бўйича 14-15 декабр кунлари Брюсселда бўлиб ўтган саммитда Европа Иттифоқи давлатлари раҳбарлари томонидан кўрсатмалар берилиши керак, деди Жозеп Боррел.

Унинг сўзларига кўра, ташқи ишлар вазирлари Европа Иттифоқининг «келажаги, хавфсизлиги ва барқарорлиги» Украина мудофаа қобилиятига боғлиқлигини таъкидлаган. Унинг аҳолиси жанг майдонида курашмоқда, ислоҳотлар ва Европа интеграциясини давом эттириш учун астойдил ҳаракат қилмоқда, деб эслатди Боррел.

ЕИ исроиллик кўчманчиларга қарши санкциялар тайёрламоқда

Жозеп Боррел шунингдек, Брюссел Исроил ҳукумати томонидан маъқулланган Ғарбий соҳилда янги турар жой биноларининг ноқонуний қурилишини қораловчи баёнот тайёрлаётганини маълум қилди. Боррелнинг ўзи фаластинликларга қарши зўравонлик қилаётган Исроил аҳоли пунктларининг радикал аҳолисини ўз ичига оладиган санкция рўйхати бўйича таклифни ишлаб чиқмоқда. АҚШ Давлат департаменти 5 декабр куни Ғарбий соҳилда фаластинликларга ҳужум қилаётган исроиллик кўчманчиларга нисбатан санкция чиқарган эди.

Европа Иттифоқи Фаластин маъмуриятига молиявий ёрдам кўрсатиш давом этади, деди Европа Иттифоқининг ташқи ишлар бўйича олий вакили. Унинг сўзларига кўра, ташқи ишлар вазирлари 7 октябрдан сўнг «Ғазо секторидаги тинч аҳолининг ҳалокатли, апокалиптик аҳволи» ва Исроилнинг бу ҳужумга ҳарбий жавобини муҳокама қилган. Ғазо сектори Соғлиқни сақлаш вазирлиги маълумотларига асосланиб, Боррел Ғазо секторида 80 минг қурбон бўлганини маълум қилди ва бу рақам «қанча одам вайроналар остида қолиб кетгани номаълум бўлгани учун янада кўпроқ» бўлиши мумкин эканини айтди. У ҳалокатни Иккинчи жаҳон урушидан кейинги Германиядаги вазиятга қиёслади.

«Исроилда хавфсизликни фақат ҳарбий йўл билан таъминлаб бўлмайди. Бу мамлакатда сиёсий тартибга солишни талаб қилади», - дея таъкидлади Жозеп Боррел ва халқаро ҳамжамиятни Европа Иттифоқи билан биргаликда Исроил ҳудудидаги икки суверен давлат лойиҳаси устида ишлашни давом эттиришга чақирди.