Yevroittifoq Armanistondagi missiyasi sonini oshirmoqda

Yevropa Ittifoqi va Armaniston hamkorlikni mustahkamlash ustida ishlamoqda va birinchi qadam sifatida Yevropa Ittifoqining Tashqi ishlar kengashi 11 dekabr, dushanba kuni Armanistondagi fuqarolik missiyasi sonini 138 kishidan 209 kishiga kengaytirishga qaror qildi. Bu Yevropa Ittifoqining chegaradagi vaziyatni barqarorlashtirishga sodiqligini va kelishuv jarayoniga hissa qo‘shish istagidan dalolat beradi, dedi Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel. «Biz hozir mintaqada tinchlikka erishish uchun tarixiy imkoniyat borligiga ishonamiz. Bunday imkoniyat paydo bo‘ldi hamda biz Armaniston va Ozarboyjon bilan birgalikda bu sa’y-harakatlarni qo‘llab-quvvatlashda davom etish niyatidamiz», - dedi Borrel Bryusseldagi matbuot anjumanida Yevropa Ittifoqi davlatlari tashqi siyosat idoralari rahbarlarining uchrashuvidan keyin.

Yevropa Ittifoqining Armanistondagi fuqarolik missiyasi (EUMA) 2023 yil 20 fevralda ish boshladi. Bu betaraf missiya bo‘lib, u faqat Armaniston hududida faoliyat yuritadi va hech qanday ijro funksiyasiga ega emas, deyiladi Yevropa Ittifoqi kengashi bayonotida. U Armanistonning chegaradosh hududlarida barqarorlikni ta’minlash, Armaniston va Ozarboyjon o‘rtasidagi munosabatlarni normallashtirish maqsadida ikki yilga mo‘ljallangan.

YeI aksariyat davlatlari - Ukrainaga yordamni oshirish tarafdori

Rossiya harakatlari kuchayishi fonida Bryussel Kiyev bilan Yevropa Ittifoqining Ukraina oldida kelajakdagi xavfsizlik majburiyatlari mavzusida ekspert maslahatlari shaklida muloqotni boshladi. «Biz harbiy yordam yetkazishimiz va shu bilan birga, taxmin qilinadigan uzoq muddatli moliyalashtirish ustida ishlashimiz kerak. Bugun vazirlarning katta qismi aniq aytdi: hozir Ukrainani qo‘llab-quvvatlashimizni susaytiradigan vaqt emas. Aksincha, hozir buni oshirish va tezlashtirish zarur», - dedi Borrel.

Yevropa tinchlik jamg‘armasining Kiyevga to‘lanmagan sakkizinchi harbiy yordami, shuningdek, jamg‘armani Ukraina Qurolli kuchlari uchun mo‘ljallangan 5 milliard yevro miqdoridagi mablag‘lar bilan yangi to‘ldirish bo‘yicha 14-15 dekabr kunlari Bryusselda bo‘lib o‘tgan sammitda Yevropa Ittifoqi davlatlari rahbarlari tomonidan ko‘rsatmalar berilishi kerak, dedi Jozep Borrel.

Uning so‘zlariga ko‘ra, tashqi ishlar vazirlari Yevropa Ittifoqining «kelajagi, xavfsizligi va barqarorligi» Ukraina mudofaa qobiliyatiga bog‘liqligini ta’kidlagan. Uning aholisi jang maydonida kurashmoqda, islohotlar va Yevropa integratsiyasini davom ettirish uchun astoydil harakat qilmoqda, deb eslatdi Borrel.

YeI isroillik ko‘chmanchilarga qarshi sanksiyalar tayyorlamoqda

Jozep Borrel shuningdek, Bryussel Isroil hukumati tomonidan ma’qullangan G‘arbiy sohilda yangi turar joy binolarining noqonuniy qurilishini qoralovchi bayonot tayyorlayotganini ma’lum qildi. Borrelning o‘zi falastinliklarga qarshi zo‘ravonlik qilayotgan Isroil aholi punktlarining radikal aholisini o‘z ichiga oladigan sanksiya ro‘yxati bo‘yicha taklifni ishlab chiqmoqda. AQSh Davlat departamenti 5 dekabr kuni G‘arbiy sohilda falastinliklarga hujum qilayotgan isroillik ko‘chmanchilarga nisbatan sanksiya chiqargan edi.

Yevropa Ittifoqi Falastin ma’muriyatiga moliyaviy yordam ko‘rsatish davom etadi, dedi Yevropa Ittifoqining tashqi ishlar bo‘yicha oliy vakili. Uning so‘zlariga ko‘ra, tashqi ishlar vazirlari 7 oktyabrdan so‘ng «G‘azo sektoridagi tinch aholining halokatli, apokaliptik ahvoli» va Isroilning bu hujumga harbiy javobini muhokama qilgan. G‘azo sektori Sog‘liqni saqlash vazirligi ma’lumotlariga asoslanib, Borrel G‘azo sektorida 80 ming qurbon bo‘lganini ma’lum qildi va bu raqam «qancha odam vayronalar ostida qolib ketgani noma’lum bo‘lgani uchun yanada ko‘proq» bo‘lishi mumkin ekanini aytdi. U halokatni Ikkinchi jahon urushidan keyingi Germaniyadagi vaziyatga qiyosladi.

«Isroilda xavfsizlikni faqat harbiy yo‘l bilan ta’minlab bo‘lmaydi. Bu mamlakatda siyosiy tartibga solishni talab qiladi», - deya ta’kidladi Jozep Borrel va xalqaro hamjamiyatni Yevropa Ittifoqi bilan birgalikda Isroil hududidagi ikki suveren davlat loyihasi ustida ishlashni davom ettirishga chaqirdi.