Қирғизистон ва Қозоғистонда кучли зилзила содир бўлди 

4 март куни соат 12:22 да Қирғизистонда 5,3 магнитудали зилзила содир бўлди. Бу ҳақда Европа-Ўртаер денгизи сейсмология маркази (EMSC) хабар берди. 

Зилзила ўчоғи Қирғизистоннинг Чўлпон-Ота шаҳридан 35 км шимоли-ғарбда, Қозоғистоннинг Олмаота шаҳридан 40 км жанубда, Бишкекдан 190 км шимолда жойлашгани аниқланган. 

Қозоғистон Фавқулодда вазиятлар вазирлиги маълумотларига кўра, 4 март куни Олмаотадан 31 км жанубда 6,1 магнитудали зилзила содир бўлган. 

Ер силкинишлари маҳаллий вақт билан 11:22 да қайд этилган. Олмаотада 5 магнитудали зилзила сезилган. 

Зилзила вақтида аҳолини огоҳлантириш тизими ишга туширилган, одамларга SMS хабар юборилган. Ижтимоий тармоқларда шаҳарликлар уйларини тарк этиб, кўчага чиқаётгани акс этган видеолар пайдо бўлди. 

Олмаота Фавқулодда вазиятлар департаменти соат 15:00 да сейсмик вазиятни баҳолаш комиссияси қарори асосида аҳолининг яшаш жойларига қайтиши мумкинлиги ҳақида хабар берган. Таъкидланишича, афтершоклар бўлиши мумкин, аммо улар хавф туғдирмайди. 

Олмаоталиклар ичимлик суви қувурлари ёрилгани, деворлардаги ёриқлар ва синган ойналар ҳақида шикоят қилишган. Шаҳар метрополитени тахминан 5 соат давомида ишини тўхтатган.