Украина Курск яқинидаги ҳарбий омборга зарба берилганини билдирди

31 июл, чоршанбага ўтар кечаси Украина мудофаа кучлари Россия Федерациясининг Курск вилоятида жойлашган қурол-яроғ ва ҳарбий техника сақланадиган омборга зарба берди, деб хабар қилди Украина Қуролли кучлари (УҚК) Бош штаби Facebook'да. «Бугун тунда Курск яқинидаги қурол-яроғ ва ҳарбий техника омборига зарба берилди, душманнинг ҳаво ҳужумига қарши мудофааси ва нишон нуқталарида портлашлар кузатилди», — дейилади хабарда.

Бош штаб маълумотларига кўра, жанговар ишларни Украина ҳарбий-денгиз кучлари кучлари ва воситаларидан бўлинмалар «мудофаа кучларининг бошқа таркибий қисмлари билан ҳамкорликда» олиб борган. Батафсил маълумотларга ҳозирда аниқлик киритилмоқда, дейилади хабарда.

Украинанинг Курск яқинидаги қурол омборига зарбасидан кейин ёнғин

Украина чегарасидан 80 км узоқликда жойлашган Курск яқинидаги ҳарбий омборга Украина ҳужумидан кейин ёнғин бошланди. «Нишонга олинган ҳудудда портлашлар кузатилди», деб ёзади dpa агентлиги. Украина ҳарбий-денгиз кучларида деярли 300 километр масофага учадиган ўзининг «Нептун» кемага қарши ракеталари бор, улар ердаги нишонларга қарши ҳам қўлланиши мумкин.

Россия битта ракета ва 19 та УУА йўқ қилинганини билдирди

Айни вақтда, Россия Мудофаа вазирлиги чоршанбага ўтар кечаси Украинанинг 19 та учувчисиз учоғи ва битта "Нептун-МД" бошқариладиган ракетаси йўқ қилингани ҳақида хабар берди. Бу маълумотларга кўра, Курск вилояти узра ракета, Белгород вилояти устида 11 та дрон, Брянск вилоятида тўртта, Курск, Калуга ва Ростов вилоятлари, шунингдек, Қрим устида биттадан уриб туширилган.

Шу билан бирга, Курск вилояти губернатори вазифасини бажарувчи Алексей Смирнов Telegram'да Украина Қуролли кучлари ҳужумидан кейин «объектлардан бирида ёнғин чиққанини» ёзди. Кечқурун у ёнғин аллақачон маҳаллийлаштирилгани ва қурбонлар йўқлигига аниқлик киритди ва эрталаб минтақанинг бошқа ҳудудида маҳаллий ёнилғи қуйиш шохобчаси ҳудудига портловчи мослама ташланганини маълум қилди. «Коренев туманидаги Количевка қишлоғи яқинида ёнилғи қуйиш шохобчаси ҳудудига украин коптеридан портловчи қурилма ташлаб кетилди», - деб ёзган Смирнов.

Украина Курск вилоятидаги нефт базасига зарба ҳақида хабар берган эди

30 июл куни Украина қуролли кучлари Курск вилоятининг Вози қишлоғидаги нефт омборига ҳужум уюштирди, деб хабар берди бир кун аввал Бош штаб. «Бугун тунда Россиянинг Курск вилояти Вози қишлоғида душман 43-сонли логистика маркази нефт омбори муваффақиятли нишонга олинди», — дейилади Украина разведкаси хабарида.

Бир кун аввал Бош штаб Курск яқинидаги инфратузилма объектларига навбатдаги ҳужум ҳақида хабар берган. Украина Қуролли кучлари хабарига кўра, «СБУ» қошидаги «Альфа» махсус операциялар маркази минтақадаги «бир қатор электр подстанцияларига» зарба берди. «Курск вилоятининг Понировский, Курск ва Солнцевский туманларида электр таъминотида узилишлар кузатилмоқда», - дея таъкидлади Украина томони.