Урганч шаҳрига 50 та замонавий автобус келтирилди

Урганч шаҳрида жамоат транспорти хизматини яхшилаш мақсадида Хитойнинг Zhongtong компаниясида ишлаб чиқарилган 50 та замонавий автобус келтирилди. Бу ҳақда вилоят ҳокимлиги хабар берди.

18 ноябр куни «Бунёд йўловчи ташиш» корхонасида янги автобусларнинг тақдимоти бўлиб ўтди. Тадбирда вилоят ҳокими Жўрабек Раҳимов иштирок этиб, вилоятда аҳолига транспорт хизмати кўрсатишни яхшилаш борасида амалга оширилаётган ишлар, янги лойиҳалар ҳақида тўхталди.

Аввалроқ, Zhongtong компаниясида ишлаб чиқарилган 30 та автобус Урганчга келтирилган эди. Қайд қилинишича, йил охиригача яна 30 таси келтирилади. Натижада шаҳарда 16 та йўналишда 148 та автобус ҳаракатланиб, ҳар куни 136 минг нафар йўловчига хизмат кўрсатиш имконияти яратилади. Йўловчи ташиш ҳажми икки баробардан зиёд ортиб, қатновларнинг оралиқ интервали 18 дақиқадан 10 дақиқага қисқаради.