«Ijtimoiy tarmoqda har kuni bitta muammo, lekin senatorlar jim» – Norboyeva

«Hududlardagi senatorlar, deputatlar markazdan ishchi guruhning kelishini kutib o‘tirmasdan, muammolarni senat yoki mahalliy kengash muhokamasiga kiritib borishi kerak. Lekin teskarisi bo‘lyapti – biz o‘zimiz borib, muammolarni qidirib topyapmiz. Mahalliy kengash deputatlarining asosiy vazifasi muammolar portfelini qilib, ishchi guruh oldiga qo‘yishi yoki joylardagi senatorlar orqali bizga murojaat qilishlari kerak.

Ijtimoiy tarmoqlarga kirib ko‘ring – har kuni bir muammo. Ichki ishlar xodimi kimnidir kaltaklagan, u o‘lib qolgan. Qaysidir hokim tadbirkorga zug‘um qilgan. Kimlardir majburiy mehnatga jalb qilingan. Qayerdadir firibgarlar odamlarni ommaviy aldagan. Chegara hududidagi aholimizni yillar davomida to‘plangan muammolar qiynab kelgan.

Bunday muammolarni hamma muhokama qiladi, munosabat bildiradi, xulosalarini aytadi, lekin o‘sha yerdagi senatorlarimiz jim. Ulardan aks-sado ham chiqmaydi. O‘sha yerda senator bormi, u nima deydi, borib xabar olsin, degandan keyingina shug‘ullanishni boshlashadi.

Yaxshi ham ijtimoiy tarmoqlar bor ekan, hamma narsani ochiq ko‘rsatib berishyapti. Aslida bu muammolarni mahalliy kengash sessiyalarida yoki senat majlislarida o‘zimiz muhokamaga olib chiqib, hal qilishimiz kerak. Deputatlarning gapirishiga, senatorlarning muhokama qilishiga hech qanday to‘siq yo‘q, hamma vakolatlar berilgan. Lekin bizda eski uslubda ishlash kayfiyati hali ham saqlanib qolyapti.

Barchangizdan senatorlik faoliyatiga jiddiy qarashingizni talab qilamiz», deya uning so‘zlarini keltirmoqda Kun.uz muxbiri.