Ombudsman fuqarolar o‘rtasidagi nizolarga oid xabarlar ko‘payib borayotganidan xavotir bildirdi

Bildirilishicha, so‘nggi paytlarda ijtimoiy tarmoqlarda fuqarolar o‘rtasida o‘zaro janjallashish, bir-birini haqorat qilish, qo‘l ko‘tarish va bir-biriga tan jarohati yetkazish kabi holatlar aks etgan videoxabarlar tarqalib bormoqda.   

“Ayniqsa, Samarqand tumanida yuzaga kelgan kelishmovchilik oqibatida ayollar farzandi ko‘z oldida erkaklar tomonidan do‘pposlanishi tasviri ko‘plab muhokamalarga sabab bo‘ldi”, deyiladi ma’lumotda. 

Ombudsman axborot xizmati materialida ta’kidlanishicha, o‘sib kelayotgan yosh avlod bu kabi o‘zaro hurmatsizlik, bir-birini obro‘sizlantirish, urush-janjal, o‘zgalar mulkiga zarar yetkazish kabi holatlarni ko‘rib tarbiya olmasligi zarur.

Ombudsman fuqarolar o‘rtasidagi nizolarni ko‘rib chiqish vakolatiga ega bo‘lmasa-da, bunday mazmundagi xabarlarning ko‘payib borayotganidan xavotirda, deyiladi xabarda.