O‘zbekiston Xitoyga loviya va quritilgan poliz mahsulotlari yetkazib berishni boshlaydi

O‘zbekiston elchixonasi Karantin va o‘simliklarni himoya qilish agentligi bilan birgalikda mahalliy mahsulotlarni Xitoy bozoriga olib chiqish bo‘yicha faol ish olib bormoqda, deb xabar qildi “Dunyo”.

XXR raisining O‘zbekistonga davlat tashrifi doirasida Xitoy O‘simliklarni himoya qilish va karantini agentligi hamda Bojxona bosh boshqarmasi o‘rtasida mamlakatdan loviya va quritilgan poliz mahsulotlarini eksport qilishda fitosanitariya talablari to‘g‘risida bayonnomalar imzolandi.

Imzolangan protokollar nuqtayi nazaridan tadbirkorlar uchun Xitoyga eksport hajmini oshirish, ishlab chiqaruvchilar va fermerlar daromadini ko‘paytirish uchun yangi imkoniyatlar ochilmoqda. O‘zbekiston eksportchilari Xitoy bozoridan maksimal foyda olish uchun barcha imkoniyatlarni ishga solishi kerak.

Shu bilan birga, O‘zbekistondan Xitoyga eksport qilinadigan mahsulotlar bayonnomalarda ko‘rsatilgan sanitariya-gigiyena, fitosanitariya qoidalari va talablariga javob berishi lozim.

O‘zbekistonlik ishlab chiqaruvchilar o‘z mahsulotlarini Xitoy bozoriga eksport qilishni yo‘lga qo‘yish uchun O‘simliklarni himoya qilish va karantini agentligiga murojaat qilishi mumkin. Agentlik qabul qilingan protokollarga muvofiq, XXR talablariga muvofiq yetkazib beruvchilar ro‘yxatini shakllantiradi.

Avval Xitoyga 17 turdagi qishloq xo‘jaligi mahsulotlarini, jumladan, gilos, mosh, yangi uzilgan poliz, kunjut va boshqa turdagi mahsulotlarni eksport qilishga ruxsat bor edi.