Yevroparlament Kiyevda ofis ochish masalasini muhokama qilmoqda

Yevroparlament va Ukraina tomoni Kiyevda Yevroparlament ofisini ochish masalasini faol muhokama qilmoqda. Bu haqda 21 noyabr, seshanba kuni DW’ga jarayonga yaqin manbalar ma’lum qildi. Ularning ma’lumotlariga ko‘ra, bu masala avvalroq ishlab chiqilgan va muhokamalar davom etmoqda, biroq hozircha aniq kelishuvga erishilmagan. 

DW suhbatdoshlaridan biri ta’kidlaganidek, bu masala raislar konferensiyasida hal qilinishi kerak. Uning navbatdagi yig‘ilishi 23 noyabr, payshanba kuni bo‘lib o‘tadi, biroq shu kuni qaror qabul qilinadimi-yo‘qmi, bu noma’lum. 

Raislar konferensiyasi Yevroparlamentning Yevropa Ittifoqining boshqa institutlari, milliy parlamentlari va Yevropa Ittifoqiga a’zo bo‘lmagan davlatlar bilan aloqalari uchun mas’ul siyosiy organidir. Raislar konferensiyasi Yevropa parlamenti spikeri va siyosiy guruhlar raislaridan iborat. 

Yevroparlament Ukrainada ofis ochish rejalarini hali tasdiqlamadi 

Yevroparlament DW nashriga «hozirda» Kiyevda ofis ochish niyati haqidagi ma’lumotni tasdiqlay olmasligini bildirdi. 

28 noyabr kuni Oliy rada spikeri Ruslan Stefanchuk Bryusselga tashrif buyurib, Yevroparlament raisi Roberta Metsola bilan uchrashadi. Ular parlamentlararo hamkorlik memorandumini imzolashi kutilmoqda. 

Yevroparlamentning Ukrainada Oliy radani qo‘llab-quvvatlashni kuchaytirish uchun vakolatxonasini ochish haqidagi qarori haqida 21 noyabr kuni kechqurun Euractiv o‘z qo‘liga tushgan hujjatga tayanib xabar berdi. Ushbu hujjatga ko‘ra, nashrning yozishicha, Kiyevda bo‘lish Yevroparlament qo‘mitalarini nafaqat Ukrainaning o‘zi, balki Sharqiy hamkorlik mamlakatlaridagi «joriy muammolar va jarayonlar haqida muntazam ma’lumot» bilan ta’minlaydi. Matnda tushuntirilishicha, Ukraina prezidenti Volodimir Zelenskiy 4 mart kuni Lvivga tashrifi chog‘ida Metsolaga shunday vakolatxona yaratish iltimosi bilan murojaat qilgan. Aprel oyining oxirida Stefanchuk bu masalani yana ko‘tardi.