Tokiodagi konferensiya: Shmixal Ukrainani qo‘llab-quvvatlashga chaqirdi

Ukraina bosh vaziri Denis Shmigal Yaponiyani Rossiyadan o‘zini himoya qilayotgan mamlakatni qayta qurish va modernizatsiya qilishni qo‘llab-quvvatlashga chaqirdi. Shmigal 19 fevral, dushanba kuni Tokioda bo‘lib o‘tgan konferensiyada: «Xususiy sektor Ukrainada tiklanishning eng muhim dvigatelidir», dedi. Tadbirda Ukraina va Yaponiyadan 300 ga yaqin hukumat va biznes vakillari ishtirok etmoqda.

Ukraina bosh vazirining ta’kidlashicha, Rossiya tomonidan keng ko‘lamli urush boshlanganidan beri Yaponiya mamlakatga 10 milliard dollardan ortiq mablag‘ yuborgan va shu tariqa Kiyevning to‘rtinchi yirik donoriga aylangan. U yapon kompaniyalariga Ukrainada «iqtisodiy mo‘jiza» bo‘lishi mumkinligini va’da qildi. «Hozir Ukraina iqtisodiyotiga sarmoya kiritayotgan kompaniyalar yaqin yillarda siz ishonmaydigan imtiyoz va imkoniyatlarga ega bo‘ladi», dedi Denis Shmigal.

Kishida: Yaponiya hududiy yaxlitligini tiklashda Ukrainani qo‘llab-quvvatlaydi

O‘z navbatida, Yaponiya bosh vaziri Fumio Kishida o‘z hukumati Ukrainani «uning erkinligi va mustaqilligini himoya qilish, shuningdek, hududiy yaxlitligini tiklashda» qo‘llab-quvvatlashga tayyorligini tasdiqladi. Bundan tashqari, Yaponiya Ukraina iqtisodiyotini barqarorlashtirish uchun uzoq muddatli yordam beradi, dedi Kishida. 

Tomonlar qator shartnomalar, jumladan, infratuzilmani tiklash, shuningdek, minalardan tozalash va qishloq xo‘jaligi sohasida hamkorlik to‘g‘risida kelishuvlarni imzoladi. Shmigal o‘zining Telegram-kanalida «iqtisodiy rivojlanish va tiklanish bo‘yicha konferensiyadan umidlar bo‘yicha bosh vazir Fumio Kishida bilan jiddiy muzokaralar olib borilganini» e’lon qildi. «Biz biznes sub’yektlari o‘rtasida aloqalar o‘rnatmoqdamiz, hukumatlararo muloqotni kuchaytirmoqdamiz. Oldinda ko‘plab kelishuvlar va samarali uchrashuvlar bor», - dedi u. 

Jahon banki, Yevropa Ittifoqi va BMT hisob-kitoblariga ko‘ra, Ukrainani tiklash uchun 486 milliard dollardan ortiq mablag‘ kerak. Tashkilotlarning yaqinda e’lon qilingan qo‘shma hisobotida aytilishicha, joriy yilning o‘zida ushbu maqsadlar uchun 15 milliard dollar yo‘naltirilishi lozim.