AQSh va Britaniya Rossiya kemalariga qarshi sanksiyalar kiritdi

Eron Rossiyaning Ukrainaga qarshi tajovuzkorligini qo‘llab-quvvatlayotgan bir paytda, 10 sentabr, seshanba kuni AQSh rasmiylari bosh ofisi Rossiyada joylashgan ikkita yuk tashuvchi kompaniya: Vafa Wholesale Ltd va Sea River Service Limited Liability Company'ga qarshi sanksiyalar e’lon qildi.

AQSh Davlat departamentining press-relizida aytilishicha, ushbu kompaniyalar «Rossiya Federatsiyasi iqtisodiyoti dengiz sektorida faoliyat yuritgan yoki faoliyat yuritmoqda». AQSh rasmiylariga ko‘ra, Vafa Wholesale Ltd Eronning UUA bilan bog‘liq uskunalarini Erondan Rossiyaga Kaspiy dengizi orqali olib o‘tgan kemalarga egalik qiladi. Xususan, gap AQSh sanksiyalariga ham duchor bo‘lgan Vafa va Vafa-1 kemalari haqida bormoqda.

Sea River Service Limited Liability Company'ga tegishli kemalar orasida «Omskiy-103», «Omskiy-119» va «Zakamsk»ga cheklovlar qo‘yildi. AQSh rasmiylariga ko‘ra, «Omskiy-103» kemasi boshqa narsalar qatorida 2024 yilning fevralida Kaspiy dengizi orqali Erondan Rossiyaga o‘q-dorilarni olib o‘tgan.

Qo‘llangan sanksiyalar tufayli yuqorida tilga olingan kompaniyalarning Qo‘shma Shtatlardagi yoki AQSh fuqarolarida bo‘lgan barcha mulklari muzlatib qo‘yildi. Bu haqda AQSh Moliya vazirligining Xorijiy aktivlarni nazorat qilish boshqarmasiga (OFAC) xabar berish kerak, deya ta’kidlaydi Davlat departamenti.

Ayni paytda, OFAC tomonidan 10 sentabr kuni e’lon qilingan ma’lumotlarga ko‘ra, Rossiyaning quyidagi kemalari sanksiyalar ro‘yxatiga kiritilgan: «Boris Kustodiyev», «Kompozitor Raxmaninov», «Omskiy-103», «Omskiy-119», «Port Olya - 3», «Port Olya - 4», Vafa, Vafa-1, «Zakamsk». Bundan tashqari, Rossiyaning «Transmorflot» yuk tashish kompaniyasi va «Olya dengiz savdo porti» kompaniyasining bosh direktori Jamaldin Pashayevga nisbatan sanksiyalar qo‘llangan.

Britaniyaning Rossiya kemalariga qarshi sanksiyalari

Xuddi shu kuni, 10 sentabrda Britaniya Rossiyaning «Skif-V», «Omskiy-103», «Musa Djalil», «Baltiyskiy» va «Begey» kemalariga qarshi sanksiyalar e’lon qildi. Britaniya hukumati veb-saytida aytilishicha, uning ma’lumotlariga ko‘ra, bu kemalar Erondan Rossiyaga harbiy yuklarni tashish bilan shug‘ullanadi.

TASS agentligi aniqlik kiritishicha, endi bu kemalarning Britaniya portlariga kirishi taqiqlanadi.

«Eron Rossiyaning asosiy harbiy qo‘llab-quvvatlovchilaridan biri bo‘lib, 2022 yil avgustidan buyon Ukrainadagi agressiv urushda foydalanish uchun Rossiyaga yuzlab uchuvchisiz uchoqlarni taqdim etdi», — deyiladi Britaniya hukumati matbuot bayonotida.

Hujjatdan ma’lum bo‘lishicha, shu kunga qadar Britaniya Rossiyaga qarshi sanksiyalar rejimi doirasida 2000 nafar jismoniy va yuridik shaxslarga nisbatan sanksiyalar kiritgan va ularning 1700 dan ortig‘i «keng ko‘lamli hujumdan keyin kiritilgan».

10 sentabr kuni Britaniya, shuningdek, Rossiya Federatsiyasi Aerokosmik kuchlari, Rossiya harbiy-transport aviatsiyasi qo‘mondonligi va 924-uchuvchisiz aviatsiya davlat markaziga qarshi ham sanksiyalar kiritdi. Bu tashkilotlarning «Ukrainaga vayronagarchilik olib kelish uchun qurol tizimlaridan foydalanish» niyati Britaniya hukumati veb-saytida cheklovlar kiritish uchun asos sifatida keltiriladi.

«Britaniya xalqaro hamkorlari bilan Eronni xatti-harakatlari, jumladan, Rossiyaga harbiy yordam ko‘rsatgani uchun javobgarlikka tortish ustida ishlashda davom etadi», deya ma’lum qildi London.