YHXBB rasmiysi haydovchilik imtihonining yangi tartibi bo‘yicha tushuntirish berdi

AOKAda bo‘lib o‘tgan matbuot anjumanida IIV YHXBB boshlig‘i o‘rinbosari Erali Bozorov mazkur imtihonlar qanday tartibda o‘tkazilishi haqida ma'lumot berdi.

«Nazariy va amaliy imtihonlarni o‘tkazishda tadbirkorlarga qo‘shimcha majburiyatlar yuklatiladi. Ya'ni ular o‘zlarining zamonaviy avtodromlarini tashkil etishlari hamda ularni avtomatlashtirilgan maxsus transport vositalari bilan jihozlashlari kerak. Sababi, imtihon olish jarayoni inson omilisiz amalga oshirilishi kerak. Biz ushbu tartibni qat'iy ushlaganmiz. Amaldagi tartib bo‘yicha imtihon olishda to‘liq inson omili aralashadi. Yangi tartibda esa inson omili aralashmasligiga harakat qilyapmiz», deya uning so‘zlarini keltirmoqda Kun.uz muxbiri.

Shuningdek, avtodromlarga joylashtiriladigan avtomatlashtirilgan maxsus transport vositalari qanday bo‘lishi ma'lum qilindi.

«Avtomatlashtirilgan maxsus transport vositalari ichida kameralari bo‘ladi. Shuningdek, uni boshqarayotgan haydovchilik guvohnomasini olishga nomzodning harakatlariga avtomatik baho bera oladi. Nomzodning natijasi ham avtomatlashtirilgan tarzda chiqariladi.

Aerodrom ham nomzodning natijalarini avtomatik tarzda chiqarib beradigan maxsus avtomatlashtirilgan moslamalar bilan jihozlanadi. Bunga tadbirkorlik sub'yekti ham, ichki ishlar idoralari xodimi ham aralasholmaydi. Dastur shunday tuziladiki, bu yerda inson omili umuman rol o‘ynamaydi», dedi Erali Bozorov.