Finlandiya va Rossiya chegarasiga 55 nafar Frontex chegarachisi yetib keldi

Yevropa chegara va qirg‘oqni qo‘riqlash agentligi - Frontex’ning 55 nafar xodimi Finlandiya chegara xizmatini qo‘llab-quvvatlash uchun Finlandiya-Rossiya chegarasi hududiga yetib keldi. Ularning aksariyatining vazifasi chegarani kuzatish bo‘ladi, dedi Frontex vakili Petr Svitalskiy 7 dekabr, payshanba kuni. Missiya hozirda yanvar oyining oxiri bilan cheklangan, ammo bu sana «kerak bo‘lsa» o‘zgartirilishi mumkin, dedi u. 

Svitalskiyning so‘zlariga ko‘ra, Frontex «migrantlar yordamida bosim qo‘llash Kreml vositalardan biri ekanligini» biladi, shuning uchun agentlik chegaradagi bunday harakatlar Rossiya tomonidan davom ettirilishini kutmoqda. 

Ayni paytda, AFP agentligi Finlandiya chegarachilariga tayanib, chegara hududida hali ham «uchinchi mamlakatlardan kelgan muhojirlarning katta guruhlari» borligini bildirdi. Finlandiya chegara xizmati hozirgi vaziyat uzoq vaqt davomida ijobiy tomonga o‘zgarmasligini kutmoqda. 

Frontex YeI chegaralarida xavfsizlikni kuchaytirish zarurligiga ishora qilmoqda 

Agentlik noyabr oyi oxirida Finlandiya chegara zonasiga Rossiya bilan chegaradagi mavjud vaziyatga javoban 50 ga yaqin zobit, shuningdek, patrul mashinalari va boshqa texnikalarni jo‘natish qarorini e’lon qildi. Shu tariqa, Frontex Yevropa Ittifoqining tashqi chegaralarini himoya qilish, Yevropa Ittifoqi xavfsizligini mustahkamlash va transchegaraviy jinoyatchilikni bostirish bo‘yicha Joint Operation Terra 2023 faoliyatini kengaytirmoqda. Ilgari Yevropa agentligining jami 10 nafar xodimi Finlandiya chegaralarda ishlagan.

«Frontex’ning Finlandiyani qo‘llab-quvvatlashi logistika doirasidan tashqariga chiqadi va Yevropa Ittifoqining o‘z a’zolaridan biriga ta’sir qiladigan gibrid muammolarni hal etishda birlashgan pozitsiyani namoyish etadi. Bu hamkorlik murakkab chegara muammolarini hal qilishda Yevropa birlashgan jabha sifatida turishini va aniq harakatlar shaklida yordam berishini ko‘rsatadi», - dedi Frontex bosh direktori Xans Leytens. 

Finlandiya va Rossiya chegarasidagi inqiroz 

Noyabr oyining oxirida Finlandiya Rossiya bilan chegarasidagi oxirgi nazorat punktini ikki haftaga yopdi va shu orqali Rossiya bilan quruqlikdagi chegarani butunlay yopdi. Faqat «Vaynikkala» temiryo‘l nazorat punkti ochiq qoldi. Dekabr oyi o‘rtalarida Finlandiya chegarani qisman ochishga hozirlik ko‘rmoqda, biroq nazorat punktlari keyin yana yopilishi mumkinligini istisno etmayapti. 

Finlandiya rasmiylari bu qarorni Rossiya chegarasi orqali Yaqin Sharq va Afrikadan noqonuniy muhojirlar oqimi fonida qabul qildi. Helsinki Moskvani ushbu migratsiya inqirozini uyushtirganlikda gumon qilmoqda. Butun sharqiy chegarani yopish qarori «Finlandiya milliy xavfsizligini Rossiyaning gibrid operatsiyasidan himoya qilish uchun» qabul qilindi, dedi bosh vazir Petteri Orpo. Estoniya hukumati ham chegarani yopish imkoniyati o‘rganib chiqilayotganini e’lon qildi.
 
Finlandiya dekabr oyi o‘rtalarida chegarani qisman ochishga hozirlik ko‘rmoqda, biroq nazorat punktlari keyin yana yopilishi ehtimolini istisno etmayapti.