Путин Си Цзиньпиннинг туғилган кунига музқаймоқ совға қилди

Россия президенти Владимир Путин Душанбеда Осиёда ҳамкорлик ва ишонч чоралари бўйича кенгаш саммити расман бошланиши олдидан 15 июнда 66 ёшни қаршилаган Хитой раиси Си Цзиньпинни туғилган куни билан табриклаб, унга ҳамкасби ёқтириб қолган, Россияда ишлаб чиқарилган музқаймоқ совға қилди.

Таъкидланишича, Путин Хитой раисини таваллуд айёми билан табриклагани унинг Душанбедаги қароргоҳига кириб ўтган.

Путин матбуот котиби Дмитрий Песковнинг таъкидлашича, Россия президенти Си Цзиньпиннинг икки томонлама муносабатларни ривожлантиришдаги ролини юқори баҳолаб, Хитой раисининг Россияга яқинда амалга оширган ташрифи муваффақиятли ўтганини таъкидлаб ўтган.

Си Цзиньпин ўз навбатида Путинга миннатдорлик билдирган ва унинг Хитойда жуда машҳурлигини таъкидлаб ўтган.

Маълум қилинишича, бир неча йил аввал Шарқий иқтисодий саммитда хитойлик тадбиркорлар Путинга Россия музқаймоғи Хитойда машҳурлигини айтишган. Шундан кейин Путин Хитойга навбатдаги ташрифи вақтида Си Цзиньпинга ушбу ширинликдан олиб борган.