Конгода маймунчечак эпидемияси бошлангани эълон қилинди

Конго Республикаси ўз ҳудудида маймунчечак эпидемияси бошланганини эълон қилинди. Бу ҳақда мамлакат соғлиқни сақлаш вазири Гилберт Мококи хабар берди. 

«Конго Республикасида маймунчечак эпидемияси бошланди. Бешта ҳудудда касалланиш бўйича 19 та ҳолат тасдиқланди, жумладан, пойтахт Браззавилда ҳам», деди вазир. 

Қайд этилишича, айни дамда мамлакатда ушбу касалликдан ўлим ҳолатлари кузатилмаган. Аҳоли ҳайвонлар билан алоқа қилмасликка чақирилган. 

Аввалроқ канадалик тадқиқотчилар Конго Демократик Республикаси шарқида «пандемия салоҳияти»га эга маймунчечакнинг хавфли янги штаммини аниқлаган эди. 

Вирус камбағал, аҳоли зич жойлашган олтин қазиб олувчи шаҳарча Камитугада топилган. Тадқиқотчилар вирусни «ушлаб туриш» ва глобал эпидемиянинг олдини олиш учун «шошилинч чоралар» кўришга чақирмоқда.