Самарқандда ўқувчига қўл кўтарган директор ўринбосарига ҳайфсан берилди

Болалар омбудсмани Самарқанд вилояти Нарпай туманида ўқувчига қўл кўтарган директор ўринбосари иши юзасидан маълумот берди.

Қайд этилишича, ижтимоий тармоқларда «Нарпайда мактаб директори ўринбосари ўқувчини калтаклади» сарлавҳаси остида тарқалган видеодаги ҳолат Болалар омбудсмани томонидан ўрганилган.

Аниқланишича, ҳолат жорий йил 20 ноябр куни содир бўлган. Нарпай тумани 6-сонли мактабнинг 8-синф ўқувчиси А.Х. (2010 йилда туғилган, ўғил бола) дарс вақтида ўқув қуроллари қолиб кетгани сабаб уларни олиб келиш мақсадида мазкур мактабнинг ўқув ишлари бўйича директор ўринбосари Ш.М.дан (1991 йилда туғилган, аёл) рухсат сўраган.

Ўқитувчи рухсат бермагани сабабли ўзаро жанжал юзага келиб, Ш.М. вояга етмаган ўқувчини уришиб, унинг юз қисмига урган ва синфдан чиқариб юборган.

Мазкур ҳолат юзасидан туман ИИБ томонидан А.Х.га нисбатан тан жароҳати бўйича судга оид тиббиёт экспертизаси тайинланган.

Ўз касбий вазифасига зид бундай ҳаракати учун ўқув ишлари бўйича директор ўринбосари М.Ш.га ММТБ томонидан ҳайфсан интизомий жазоси қўлланган.

Аввалроқ Ўрта Чирчиқда 9-синф ўқувчиси синфдошлари томонидан калтаклангани, Тошкентда лицей ўқитувчиси ўқувчини дўппослагани тўғрисида хабар берилганди.