Shols: NATO hududining har bir qarichini himoya qilishga tayyormiz

Ukrainadagi urush “muzlatilgan mojaro”ga aylanmasligi kerak. Germaniya kansleri Olaf Shols 26 may, juma kuni Tallinga tashrifi chog‘ida bunga ishonch bildirdi. U Estoniya bosh vaziri Kaya Kallas, Latviya bosh vaziri Krishyanis Karinsh va Litva bosh vaziri Ingrida Shimonite bilan birgalikda matbuot anjumanida qatnashdi.

Shols uchun bu - Germaniya kansleri sifatida Estoniyaga birinchi tashrifi. Kallasga murojaat qilib, u zamonaviy Germaniya va Estoniya hududidagi shaharlarni o‘z ichiga olgan o‘tmishdagi Ganza ittifoqini esladi.

Sholsning so‘zlariga ko‘ra, Rossiya prezidenti Vladimir Putin Ukrainaga hujum uyushtirib, “Yevropani bo‘lmoqchi” bo‘lgan, biroq hisob-kitoblarida xatoga yo‘l qo‘ygan va “birligimizni mustahkamlagan”. U NATOni zaiflashtirmoqchi bo‘ldi, biroq “teskarisiga erishdi”, deya qo‘shimcha qildi Germaniya kansleri. Jurnalistlar bilan suhbatda Germaniya vazirlar mahkamasi rahbari G‘arbning Rossiyaga qarshi sanksiyalarini yanada kuchaytirishga va ularni chetlab o‘tishga urinishlarga qarshi kurashga va’da berdi.

Germaniya kansleri, shuningdek, Germaniyaning Boltiqbo‘yi NATO hamkorlarini hujum sodir bo‘lgan taqdirda himoya qilishga sodiqligini yana bir bor tasdiqladi. “Bu yerda, Boltiqbo‘yida, NATOning sharqiy qanotida xavfsizlik bilan bog‘liq vaziyat og‘irligicha qolmoqda”, dedi u. Germaniya vazirlar mahkamasi rahbarining ta’kidlashicha, nemis jangovar brigadasining qismlari yaqin haftalarda mashg‘ulotlar uchun yana Litvaga yuboriladi. "Biz NATO hududining har bir kvadrat santimetrini hujumdan himoya qilishga tayyormiz", - dedi Shols o‘tgan yili bergan va’dasini eslatib.