Murojaatdan so‘ng: Dehqonobodning Yangiqishlog‘ida yangi ko‘prik qurildi

2022 yilning 10 noyabrida Kun.uz saytida Qashqadaryo viloyatining Dehqonobod tumanidagi Yangiqishloq aholisining murojaati e’lon qilingan edi. Unda aholi Yangiqishloq va Boyqo‘rg‘on hududlaridan oqib o‘tadigan Katta Ura daryosiga yangi ko‘prik qurib berishni so‘ragan. Katta Ura daryosi ustidagi ko‘prik 40 yil oldin qurilgan bo‘lib, abgor ahvolda edi. Qishloqliklar hashar yo‘li bilan quradigan ko‘prikni esa har yili sel yuvib ketgan. Tuman aholisining yangi ko‘prik qurilishini so‘rab mahalla va hokimiyatga qilgan murojaati javobsiz qolgan.

Ma’lum bo‘lishicha, Yangiqishloqqa 2023 yilning sentabr oyida ko‘prik qurib topshirilgan. Ko‘prik uzunligi 50 metr, eni 5.5 metrni tashkil qiladi. Umumiy qiymati esa 2 mlrd so‘m. Tuman aholisi, o‘qituvchi va shifokorlar ko‘prikning qurilishi ular uchun muhim voqea ekanini aytmoqda.

“Chunki bir necha yildan beri mustahkam ko‘prik Yangiqishloq va boyqo‘rg‘onliklar uchun orzu edi. Ayniqsa sel suv toshqini, bahor qish oylarida juda qiyin bo‘lar edi. Bu yil kuzda shu muammo haqida o‘ylamaydigan bo‘ldik”, – deydi tumandagi 13-maktab o‘qituvchisi Bekzod Yaxshiboyev.

Tuman hokimligi Dehqonobodda bunday ko‘priklar 2023 yilda 74 ta qurib topshirilganini va yana yil oxirigacha bu son ortishini bildirdi.