Londondagi sudda ikki bolgar RF uchun josuslik qilganini tan oldi

Buyuk Britaniyada hibsga olingan Bolgariyaning ikki fuqarosi Rossiya foydasiga josuslik qilganlikda aybini tan oldi. Bu haqda 28 noyabr, payshanba kuni Londondagi Markaziy jinoiy sud majlisi chog‘ida ma’lum bo‘ldi. 46 yoshli Orlin Rusev va 43 yoshli Bizer Jambazov majlis boshlanishidan oldin buni tan olishgan, deb xabar beradi dpa agentligi. Xuddi shu ish bo‘yicha yana uch gumonlanuvchi o‘z aybini tan olmadi, deya xabar beradi dpa.

Tergov aybiga iqror bo‘lgan Rusev Moskvaga ishlagan ayg‘oqchilar guruhini boshqargan, deb hisoblaydi. Taxminlarga ko‘ra, u rus razvedka xizmatlari bilan hamkorlik qilgan va keyinchalik yashiringan avstriyalik tadbirkor Yan Marsalekdan topshiriq olgan.

Tergov ma’lumotlariga ko‘ra, josuslik guruhi nafaqat Buyuk Britaniyada, balki Germaniya, Avstriya, Ispaniya va Chernogoriyada ham faoliyat yuritgan, deya qayd etadi dpa. Sud jarayonida prokuror Elison Morganning aytishicha, ayblanuvchilar odamlar yoki narsalar tasvirini olgan hamda 2020 va 2023 yillar oralig‘ida o‘z maqsadlari haqida batafsil hisobotlar yozgan. Buning evaziga ular «katta miqdordagi pul» olgan, dedi Morgan.

Wirecard bankrotligida Marsalekning roli

Ilgari Wirecard moliyaviy kompaniyasida savdo bo‘yicha direktor lavozimini egallab kelgan Yan Marsalek bir necha yil davomida nemis adliyasidan yashirinib yurgan, u Rossiyada FSB tomonidan taqdim etilgan davlat himoyasi ostida yashaydi, deb ishoniladi. U Wirecard mojarosida asosiy gumondor sanaladi, deya eslatadi dpa. Marsalek, asosan, Osiyoda Wirecard nomidan kredit karta to‘lovlarini qayta ishlagan, tashqi to‘lov xizmatlarini ko‘rsatuvchi uchinchi tomon hamkor kompaniyalari bilan biznes uchun mas’ul edi.

2020 yil iyun oyida 1,9 milliard yevro – bu biznesdan olingan taxminiy daromad «izsiz g‘oyib bo‘lgani» ma’lum bo‘ldi: Filippindagi go‘yo pulni ushlab turgan ikkita bank ularda bunday mablag‘ yo‘qligi va hech qachon bo‘lmagani haqida xabar berdi. 25 iyun kuni Wirecard «ortiqcha qarz»ga asoslanib, bankrotlik to‘g‘risida ariza berdi. Guruhning qulashi aniq bo‘lgach, Marsalek Germaniyani tark etdi.

«Dose» va Süddeutsche Zeitung gazetasi tomonidan olib borilgan surishtiruvga ko‘ra, 2021 yilda Yan Marsalek German Bajyenov soxta ism-familiyasi ostida Rossiya pasportini olgan. Shu bilan birga, unga berilgan hujjatning raqami, jurnalistlar aniqlaganidek, Rossiya Federatsiyasi Davlat dumasi sobiq deputati Darya Mitinaning muddati o‘tgan pasportiga to‘g‘ri keladi va rasmiy ravishda haqiqiy emas bo‘lishi mumkin.