Uy-joy qurilishida yangi tizim joriy etilishi mumkin

Shavkat Mirziyoyev 12 dekabr kuni uy-joy qurilishida aholi uchun mablag‘larni kafolatlash tizimi taqdimoti bilan tanishgandi.

Unda ko‘p hollarda uylarni topshirish muddati kechikib, aholi to‘lagan pullar «muzlab» turgani, ulushdorlik shartnomalari hech qayerda ro‘yxatga olinmay, faqat quruvchining manfaatiga xizmat qilayotgani qayd etilgan.

Qurilish va uy-joy kommunal xo‘jaligi vaziri Sherzod Hidoyatov «O‘zbekiston 24» telekanaliga bergan intervyusida rejalashtirilayotgan o‘zgarishlar haqida gapirdi.

«Bugungi kunda respublikada aksariyat uylar ulushdorlik orqali tasodifiy qurilmoqda. Muhtaram prezidentimiz bu masalani huquqiy jihatdan tartibga solish, xorijiy davlatlar tajribasini o‘rganish, qonunni shu yerda tatbiq etish bo‘yicha topshiriqlar berdi. Bu uylarda odamlarda shubha va muammo bo‘lmasligi uchun aholini to‘g‘ri, qonuniy va ishonchli asosda uy-joy bilan ta’minlash tizimini yaratish bo‘yicha topshiriqlar berildi», — dedi u.

Unga ko‘ra, yangi tizimda aholi pullari uchun banklar javobgar bo‘ladi.

«Odamlar pulni o‘zlari bilmagan quruvchiga emas, balki bankka olib boradi. Bank bu pulni ishonchli developerga jo‘natadi, u ishning 30 foizini o‘z mablag‘lari hisobidan amalga oshiradi, qolgan 70 foizi esa bank tomonidan konkret uyni qurish uchun ajratiladi. Mijozlar pulni boshqa maqsadlarga yo‘naltira olmaydi. Ular faqat shu obektni qurib, foydalanishga topshiradi. Eskrou tizimi tugaganidan so‘ng, ular daromadni boshqa maqsadlarga yo‘naltirishlari mumkin bo‘ladi», — dedi Sherzod Hidoyatov.

Taqdimotda qayd etilishicha, elektron platformada ro‘yxatdan o‘tgandan so‘ng turar joy va noturar joy ko‘chmas mulk obektlarining maketiga o‘zgartirishlar kiritish, shuningdek, turar joyni rekonstruksiya qilish yoki sotish bilan bog‘liq o‘zgarishlarni ekspertizaga kiritish taqiqlanadi. Shuningdek, qurilishi tugallanmagan obektlar uchun kadastr hujjatlarini rasmiylashtirish, obekt joylashgan yer maydonini sotish taqiqlanadi.

Agar obektni qurish uchun kredit ajratilgan bo‘lsa va quruvchi qurilishni tugatmasa, u ishni yakunlaydigan bank balansiga o‘tkaziladi.

«Prezident aholi pullarini muzlatib qo‘ymaslik haqida ko‘rsatma berdi. Masalan, odam uy-joy uchun to‘laydi, lekin uning rejalari o‘zgargan, shuning uchun unga aktivni eskrou tizimida sotish imkonini beruvchi tizim paydo bo‘ladi», — dedi u.

Barcha operatsiyalar Qurilish vazirligining «Shaffof qurilish» tizimi orqali amalga oshirilishi rejalashtirilgan, bunda qurilish inspeksiyasi, Arxitektura va shaharsozlik boshqarmasi, Shaharsozlik hujjatlarini ekspertiza qilish respublika markazi va Kadastr agentligidan olingan barcha ma’lumotlar yig‘iladi.

«Eng muhimi — aholini kafolatli uy-joy bilan ta’minlash», — dedi vazir.