YeIning 15 ta davlati suriyaliklarning boshpana so‘rovini ko‘rib chiqmayapti

Germaniya va Yevropa Ittifoqining boshqa 14 davlati ayni paytda suriyaliklarning boshpana so‘rovlarini ko‘rib chiqishni to‘xtatgan. Bu haqda 19 dekabr, payshanba kuni Yevropa Ittifoqining boshpana masalalari bo‘yicha agentligiga (EUAA) tayanib, epd agentligi xabar berdi.

«Ayni paytda Yevropa Ittifoqi davlatlari juda ehtiyotkor», dedi ushbu idora direktori Nina Gregori Funke media-guruhi nashrlariga bergan intervyusida. Uning aniqlik kiritishicha, Yevropa Ittifoqi avvalo Suriya Bashar Asad rejimi qulagandan keyin qanday rivojlanishini ko‘rmoqchi. «Biz Suriyadagi vaziyat barqarorlashadimi va yangi tuzum haqiqatan ham butun mamlakat hududini nazorat qila oladimi yoki yo‘qmi, buni diqqat bilan kuzatib boramiz», — deya ta’kidladi Gregori.

Uning so‘zlariga ko‘ra, Suriyada odamlarning ta’qib qilinishi uchun asosiy mas’uliyat uning Moskvaga qochib ketgan sobiq prezidenti Bashar Asad zimmasida. «Vaziyatning rivojlanishiga qarab, endi boshpana so‘rash uchun ariza berishni oqlaydigan boshqa asoslar bor yoki yo‘qligini tekshirishimiz kerak», deb tushuntirdi Funke media-guruhi suhbatdoshi. Uning fikricha, uzoq muddatda Yevropa Ittifoqi mamlakatlarida ko‘plab suriyaliklarning qolish huquqidan voz kechishi uchun qonuniy istiqbollar ochilishi mumkin.

Damashq yaqinida ikkita ommaviy qabr topildi

Suriyada, uning hukmdori Bashar Asad davrida, 2013 yildan beri 100 mingdan ortiq odam qiynoqqa solingan yoki o‘ldirilgan bo‘lishi mumkin. Bu bahoni 17 dekabr kuni Reuters bilan suhbatda AQShning harbiy jinoyatlarni tergov qilayotgan sobiq elchisi Stiven Rapp bildirdi.

U avvalroq ikki ommaviy qabrga borgan: Damashq yaqinidagi Qutayfa va Najha shaharlarida. «Bizda, albatta, bu mashinada (ommaviy qiynoqlar va qotilliklardan) g‘oyib bo‘lgan va qiynoqqa solingan holda o‘ldirilgan 100 000 dan ortiq odam bor», dedi u.

«Biz natsistlar davridan beri bunaqasini ko‘rmaganmiz», dedi Rapp. U ilgari Ruanda va Serra-Leonedagi urush jinoyatlari tribunallarida ayblovni boshqargan va hozir Suriya fuqarolik jamiyati bilan Asad rejimi tomonidan sodir etilgan harbiy jinoyatlar dalillarini hujjatlashtirish va ehtimoliy sud jarayonlariga tayyorgarlik ko‘rishda yordam bermoqda, deya tushuntiradi Reuters.

O‘z navbatida, bosh qarorgohi Qo‘shma Shtatlarda joylashgan Suriya Favqulodda vaziyatlar guruhiga rahbarlik qiluvchi huquq himoyachisi Muaz Mustafo jurnalistlarga, uning hisob-kitoblariga ko‘ra, birgina Qutayfada kamida yuz ming jasad dafn etilganini aytdi.